Shillong, Naitung 3 : Ka World Bank ka la khot ïa ka Expression of Interest (EoI) na ki kompani na ka bynta ban tei ïa ka jingkieng ha Shella, East Khasi Hills District.
U Symbud Myntri Rangbah uba dei peit ïa ka tnad PWD (Roads) u la ong ba ka World Bank ka la mynjur ban pyntreikam ïa kane ka projek kat kum ka Engineering Procurement Construction (EPC) Mode. U la ïathuh ba lai haduh saw tylli ki kompani kiba don ka jingthrang ban trei ïa ka kam ki la leit jurip na ka bynta ban pynkhreh ïa ka Detail Project Report (DPR) jong kane ka jingkieng Shella. ïa ka DPR yn sa bishar bniah da ka sorkar.
U la ïathuh ha kaba nyngkong ka jingthmu ban tei ïa kane ka jingkieng ka long na ka fund jongka Lafarge hynrei namar ba ki trai jaka na baroh ar liang ki pyrshah kumta kane ka projek ka la suki noh.
ïa kane ka jingkieng la bei pisa da ka World Bank lyngba ka Meghalaya Integrated Transport Project (MITP). Ha ka jingshisha ka DPR kaba nynkong ka la mang 20.49 klur hynrei namar ba la pynkylla noh ïa ka jaka ka jingpynkhreh ïa DPR kaba thymmai ka dang ïaid shakhmat. ïa kane yn leh hadien ba la dep aiti ïa ka kam ha kano kano ka kompani kaba biang eh ka EOI.
