Khot da ka jingïalang ki seng saiñ pyrthei ym ban thaw committee halor ka lynti rel, kyntu u Mukul

Shillong, Jylliew 06: U nongïalam ka liang pyrshah u Mukul Sangma u la kyntu ïa ka sorkar jylla ba kan khot noh ïa ka jingïalang jong baroh ki seng saiñ pyrthei ban ïakren haba ïadei bad ka jingpyntreikam ïa ka railway project ha ka jylla ha ka jaka ba kan thaw ïa ka committee halor kane ka kam.
Haba kren sha ki lad pathai khubor u Sangma, uba dei ruh u nongïalam ka TMC, u la ong ba ka long kaba donkam ban ïasyllok hapdeng ki seng saiñ pyrthei bad ym dei bad ka committee.
U la ong ba ki nongshong shnong ka jylla ba kynthup ïa ki seng bapher bapher ka imlang sahlang ki la ïai ban ba kin ym mynjur bad ka rai jong ka sorkar ban ïaid shakhmat bad ka jingpyntreikam ïa ka railway project.
“Ngi la dep ban tip ïa ki jingsngewkhia jong ki. Namar kata kumno ngin lah ban pynbeit ïa kane? Hato ka don ka lad ka lynti? Kumta shah ïa ngi ban ïasyllok nyngkong ïa kane, bad dei kane kaba nga la pyrshang ban ïakren hapoh ka Ïing Dorbar Thaw aiñ,” ong u Sangma.
Katkum ka jingong jong u, ka sorkar kam lah tang ban shu thaw ïa ka committee bad ban khmih lynti ba baroh kin don bynta lang ha ka.
“Namar kata nga ong, balei phim khot ïa baroh ki nongïalam jong ki party ban ïakren bad ban ïashong nyngkong. Phi hap ban sngewthuh ïano phi ïakren bad phi dei ban sngewthuh ïa baroh ki jingeh jong kane ka kam,” u la ong.