Jowai, Naitung 20: Ka West Jaiñtia District Sports Association (WJDSA) Jowai lyngba u Hony General Secretary ma Lammat-oo Laloo, la pyntip ba kan khot Entry Fee na ka bynta ka lympung ïalehkai phutbol ba la tip kum u (L) Kesilroy Pala Invitation Football Knock Out Tournament 2023.
Ïa ka bai Entry Fee kan long Rs. 5000/- kynthup lang ïa baroh ki 25 ngut ki players na kawei ka kynhun bad ki player kin hap neh naduh kaba sdang tad haduh ba kut jong ka Tournament.
Na ka bynta ka khusnam sha ki nongjop kan long da ka song pisa kaba 5 lak tyngka ïa ka kynhun lahduh bad ka 2 lak tyngka ïa kaba wan ba ar ha ryngkat bad ki Trophy.
Shuh shuh la pyntip ba ïa ki 8 tylli ki Super Division ki lah ban wan lang bad ki Dorbar Shnong jong ki ha ka por ba wan Entry.
Ha ka juh ka por la khot lang ïa ki Dorbar Shnong, Football Club, Academy, kiba pynïasoh bad ka WJDSA, kumjuh ïa ki District, Sub-Division Block Sports Association, kiba dei napoh ka Ri-Lum Jaiñtia bad kito ki kynhun ban rung ha ka MSL Jaiñtia Hills ban kin wan ïashim bynta lang ha kane ka lympung.
Ka tarik ba khadduh ban pynpoi ïa ka bai Entry kan long haka 5.8.23 ha u Hony General Secretary ka WJDSA
Yn pdiang tang hapoh 32 tylli ki kynhun (Teams) kiba wan ban pynrung kyrteng shwa, ïa ka jingtip ba kham bniah lah ban phone ha kine ki No. 9485432298/9612402753.
