Khot bad wer paidbah ka Dorbar Shnong Moolamylliang, EJHD sha ka prokram ban pyllait jingthaba ding Khristmas

Khliehriat, Nohprah 12: Ka Dorbar Shnong Moolamylliang East Jaiñtia Hills District, kumba ju leh man la u snem, ha kane ka snem ruh kan pdiang sngewbha ïa ka krismas bad u snem thymmai da ka jingpyn thaba ding ïa ka shnong ka thaw baroh kawei ha ki jingthaba rong bapher bapher kaba ju tip ruh kum ka ‘Christmas Light Extravaganza’, kumta ka Dorbar Shnong ka khot bad ïawer ïa ki paidbah ba kin wan ban ïa sakhi lang ïa kane ka prokram ba kyrpang kaba yn pynlong ha ka 17 tarik mynta u bnai nohprah 2022 ha shnong Moolamyliang, ha kaba u Chief Electoral Officer jong ka Meghalaya, u bah Frederick Roy Kharkongngor, IAS un sa wan ban long kum u kongsan ha kane ka sngi.
Ha katei ka sngi, yn ïa don lang ruh u Deputy Commissioner ka East Jaiñtia Hills District, u Abhilash Banarwal, IAS kum u symbud kongsan bad yn pynbyrngia ruh da ki jingrwai na u Eladmitre Dkhar, na Jowai, ka jingpynthaba ïa ki ding (Lights) kan sdang ha ka por 5 baje jan miet, ïa kine ki jingtaba ding yn pynmeh man la ka jan miet naduh ka por 5 baje kata naduh ka 17 tarik u nohprah haduh ka 3 tarik u kyllalyngkot 2023.
Na ka bynta kito kiba kwah ban sah miet, ka Dorbar Shnong ka la pynkhreh ïa ki ïing jaiñ (tent) bad kumjuh ruh ki hotel kiba don ha Khliehriat, ban ïoh jingtip ba kham bniah lah ban phone ha u number 7742307038.
Ïa ka jaka bam la buh ha TISTA Resturant, Khliehriat West, na ka bynta ki jingtip ba kham bniah lah ban phone ha u number 9862889655 bad 8131061998.
La pynshai ruh ba ka bai rung kan long T 50 tyngka marwei bad ïa ki khyllung rit ym donkam ban siew.
Katkum ka jingpynbeit la pynshai ruh ba ha ka 18 tarik pat kan dong ka Bonfire bad yn pyni ïa ka Worl Cup ha ka Giant Screen bad ha ka jan miet jong ka 22 tarik bad 23 tarik kan don ka Concert, ka Group Dance bad ki jingrwai krismas DJ, ha ka 24 tarik kan don ka Cristmas Carol bad yn tem ruh da ka kynhun Orchestra Band kaba na shnong Sakhaiñ ha ka por 6 baje janmiet.