Nongpoh, K’Lyngkot 25: Ka ophis u Sub-Divisional Officer (SDO) Pathrkhmah Civil Sub Division haka jingsnohkti lang bad ka ophis u District Sports Officer ka Ri-Bhoi District haka sngi Saitjaiñ kila pynlong ïaka jingïakop mareh marathon bad kumjuh ruh ka rally ki ar shaka ban rung sha kylleng ki shnong ban khot bad wer ïaki paidbah ban shim bynta haka jingrakhe ïaka Republic Day lashai ka 26 tarik.
Ïa kane ka jingïakop mareh marathon la sdang naduh Jirang bad pynkut pat ha phyllaw ka Patharkhmah Government Higher Secondary School ha kaba ki khun samla kynthei bad shynrang kila wan ban shim bynta ha kane ka jingïakop mareh kaba 5km ka jingjngai tang naka bynta ki nongshong shnong ka thaiñ Patharkhmah.
Ha kane ka jingïakop mareh naka liang ka ophis u SDO Patharkhmah kila ai mynsiem ruh ïaki nongïashim bynta da ki khusnam pisa ryngkat ki syrnod ha kaba u nongjop ba nyngkong un ioh ?5,000/, u ba ar ?3,000/- bad u ba lai ?2,000/- ryngkat bad kiwei pat ki khusnam.
Lyngba kane ka kyrwoh naka liang ka ophis u SDO Patharkhmah Civil Sub Division kala khot bad wer ïaki paidbah ban ïa mih ryntih ha kane ka sngi ban shim bynta haka jingrakhe ïaka Republic Day kaba 77 kaba yn sa rakhe ha kylleng ka ri haka 26 tarik ryngkat ki prokram bapher bapher, khnang ba katei ka jingrakhe kan long kaba iphuh iphieng bad kaba itynnad.
