Shillong, Nailur :Namar ba ka jingtreikam jong baroh ki nongsam mar rashon ne ki Fair Price Shop Dealer ha ki jaka sor bad ki thaiñ nongkyndong (urban and rural) Centre kan kut noh ha ka 31.12. 2022, kumta na ka liang ka Deputy Commissioner, East Khasi Hills ka khot aplikeshon thymmai na ka bynta ban thung ïa ki Fair Price Shop dealer na ka bynta ka snem 2023 haduh 2027, kata na ka bynta baroh ki Fair Price Shop Centres kiba hap hapoh East Khasi Hills District.
ïa ki aplikeshon form dei ban ïoh jingmynjur da ki rangbah shnong ba la ithuh da ka aiñ bad na ka bynta ki thaiñ nongkyndong kaba la ïoh jingmynjur lyngba ki Block Development Officer, bad ban tah ruh ïa ka court fee stamp kaba T. 25/-.
Kiwei pat ki kot ki sla kiba donkam ban phah ki kynthup ïa ka ST Certificate lane ka certificate nongshong shnong ba pura ka Meghalaya (Permanent Resident Certificate of Meghalaya), EPIC na ka jylla Meghalaya, Aadhaar Card, Bank Passbook, Mobile Number, artylli ki passport size bad ka rai ba la ai da ka dorbar shnong bad ka Vigilance Committee ba la thung na ka bynta ka snem 2023-2027.
Ki nong aplai ki dei ban long ki nongshong shnong ka jylla Meghalaya bad ki dei ban dei kiba shong ba sah ha kito ki centre kiba ki aplai la kumno kumno 10 snem bad ba ki dei ban ïoh ïa ka shithi jingmynjur na ki bor shnong bad vigilance committee.U/Ka ki dei ban long kiba la don ka jingnang jingtip bad kim dei ban long ki Rangbah Shnong lane ki Secretary Shnong lane ki dkhot jong ka Executive Committee jong ka shnong ne ka centre kaba ki aplai.
ïa ka aplikeshon form lah ban ïoh na ka ophis jong ka Deputy Commissioner, East Khasi Hills, Shillong ha ki sngi bad por long trei, bad ka tarik ba khatduh ban phah ïa ka aplikeshon form ka long 28 tarik u Risaw 2022.
ïa ki jingtip ba kham bniah lah ruh ban ïoh na ka ophis jong ka Deputy Commissioner, East Khasi Hills, Shillong.
