Shillong, Nohprah, 07: U President ka People’s Democratic Front (PDF) Bah Gavin M. Mylliem, u la pyntip ba ka Party kan sdang ban khot aplikeshon na ka bynta ki kyrtong kiba kwah ban aireng ha ka elekshon sha ka Ïingdorbar Thawaiñ ka Jylla naduh ka 12 tarik u Nohprah, 2022.
U la ong ba ka Party kam kwah eh ban shu ïa bun ngut ki kyrtong hynrei ka kwah ïa ki kyrtong kiba biang bad kiba don ïa ka lad ban jop.
Ha ka jingïakren bad ki lad pathai khubor, u Bah Gavin Mylliem uba long ruh u MLA ka Sohra Constituency u la ong ba shen ruh ka Party kan sa pyllait noh ruh ïa ka thup ba nyngkong jong ki kyrtong ki ban ïa aireng ha ka elekshon.
Ha kaba ïadei bad ki arngut ki MLA ka Party ba kynthup ïa u MLA jong ka Mylliem Constituency u Bah Hamletson Dohling bad u MLA jong ka Umsning Constituency u Bah Jason S Mawlong kiba la khreh ban ïakhun noh na kiwei pat ki party, u Bah Gavin u la ong ba kim pat phah jingpyntip eiei hynrei ki Zonal Committee ha kine ki Constituency ki dang treikam.
U la ong ba ym lah ban len ba kiwei ki party ki la pyrshang dohïap ban khring ïa ki kyrtong kiba don bha ka lad ban jop hynrei kum ki MLA ki hap ban sngewthuh bad ban skhem ka nongrim haba ïasnoh sha kano kano ka Party.
