Shillong, Nailur: Namar ka samoi treikam jong baroh ki nongsam mar rashon (Fair Price Shop Dealers) kiba hap hapoh Pynursla Civil Sub Division kan kut noh ha ka 31.12. 2022, kumta na ka liang ka ophis u Sub Divisional Officer (Supply), Pynursla Civil Sub Division ka khot aplikeshon na ka bynta ban thung thymmai ïa ki nongsam rashon na ka bynta ka snem 2023 haduh u 2027 na ka bynta baroh ki centre kiba hap hapoh ka Pynursla Civil Sub Division.
ïa ki aplikeshon form dei ban ïoh ka jingmynjur lyngba ki rangbah shnong bad da ki Block Development Officer, Pynursla C & RD Block nalor ka jingtah ïa ka stamp kaba T. 25/-.Kiwei pat ki kot ki sla ba donkam kiba dei ban phah ki kynthup ïa ka ST Certificate lane ka Permanent Resident Certificate ka jylla Meghalaya, EPIC na Meghalaya, Aadhaar Card, Bank Passbook, Mobile Number, artylli ki dur passport size bad ka rai ba la ai da ka Dorbar Shnong bad ka Vigilance Committee kaba la thung na ka bynta ka snem 2023-2027.
Ki nong aplai ki dei ban long ki nongshong shnong ka Meghalaya bad ki dei ruh ban long ki nongshong shnong jong ka centre kaba ki aplai na ka bynta 10 snem bad ki dei ban ïoh ïa ka shithi jingai jingmynjur na ki bor shnong bad ka vigilance committee. U/Ka ki dei ban long kiba la nang thoh nang tar bad kim dei ban dei ki Rangbah Shnong lane ki Secretary shnong lane ki dkhot jong ka Executive Committee shnong ne centre kaba ki aplai.
ïa ki aplikeshon form lah ban ïoh na ka ophis jong u Sub Divisional Officer (Supply), Pynursla Civil Sub Division, Pynursla ha ki kynta long trei bad ka tarik ba khatduh ban pynpoi ïa ki aplikeshon form ka long ha ka 28 tarik u Risaw 2022.
