Khohreh ka sorkar ban lape ïa ki surok bad ki lynti ki syngkien ba wan u Modi

Shillong, Nohprah 17: Ka jingwan jong u Myntri Rangbahduh ka ri u Narendra Modi bad kiwei de ki Myntri Sorkar pdeng sha ka jylla na bynta ka jingrakhe jong ka North Eastern Council ïa ka Jubili Ksiar mynta la sakhi ïa ka jingkhohreh ka sorkar jylla ban lape ïa ki surok kiba jot bad ban airong airup ïa ki kynroh bad ki lynti syngkien ha kylleng ki bynta jong ka surok kiba u Modi un hap ban ïaid lyngba.
La sakhi ba ki surok naduh surok 7mer ter ter shaduh Umshyrpi bad kumjuh ruh ha ka thaiñ IGP Point, bad ha ka thain Polo ka don ka jinglape bad ka jingsiang pynbha lut bad ka jingairong ba shimiet shimiet ïa ki kynroh na bynta ka jingwan u Modi.
Kane ka jingmaramot kyrkieh jong ka tnat PWD ïa ka surok ka la long pynban ka jingmyntoi ïa ki paidbah kiba ju ïakynduh jingeh da ki snem haba ki leit ki wan lyngba ka surok ha ka thain Upper Shillong.
Haba ïakren bad katto katne ki riew paidbah halor kane ka jingkhohreh ka sorkar ban lape ki pynpaw ïa ka jingsngew ïoh jingmyntoi wat la lehse ka sorkar ka pynbha ïa ka surok ym na bynta u paidbah hyrei na bynta u Modi. Lah ruh ban sakhi ba kane ka jingkhohreh ka sorkar ban siang ïa ki surok ka la pynjur ïa ka dheng kali ha ki bynta ka surok Upper Shillong kaba ki kali ki sahkut da ki bun bun kynta wat haduh shiteng synïa ruh.
“Ka jingwan u Modi ka pynmyntoi shirukom ïa ngi namar lada ym wan ma u ka surok naduh 7 mer ter ter shaduh sor Shillong ki don bun ki thliew ki syar ka sorkar ka matlah ban pynbha ïa ki,” ong uwei u nongñiah kali kamai.
“Kane ka jingkhohreh ka sorkar ban pynbha shimiet shimiet ka pyni shai ruh ba kam ler ban treikam bad ka matlah ban ïohi lymda wan u Modi bad leshe ka jingpynbha ka dei beit ba u Modi un pyrkhat ba ki surok ka Shillong ki dei kiba bha bad kiba itynnad,” u la bynrap.
Shuh shuh kawei pat ka longkmie kaba shong ha kane ka kali kamai ka la bynrap, “Lada dei ba nga ïoh ïakynduh bad u Modi ngan ïai jingmut ba un leit sha ki dong ki kyntoit ba un sakhi ïa ki surok kiba jot ba sniew bad lehse kane kan pynlehraiñ ïa kane ka sorkar kaba matlah ban peit ïa ka jingeh kaba u paidbah u ïakynduh lymda wan u Modi.”
Haba ïakren bad uwei pat u nonghikai skul u bym kwah ban pynpaw kyrteg u la ong, “Kane hi kaba ngi sakhi ka long thik kum ha ka poitry jong u Myllung Kynpham Sing Nongkynrih uba ong ba haba wan u Myntri Rangbah shlei ki siej bad un wan ruh kumba ong u Myllung ba un maham ïa kita ki nongsynshar bamsap hynrei un kut tang ha ka jingkren un ym shim kino kino ki lad pynshitom ïa kine ki nongsynshar bamsap,” u la ong bad u la bynrap shuh shuh, “Ka jingwan jong u shane ka dei beit tang ka rongphong ym eh ba u kwah ïohi ne sngap ïa kaei kaba ki nongshong shnong ki kynduh jingeh, namarkata, lada phi pule ïa kato ka poitry u Myllung Kynpham Sing kaba u la thoh la katto katne snem mynshuwa kan ïadei sbiak bad kane ba mynta bad ka jingwan ki Myntri Rangbah bad kan ïai ïadei ruh ha ki snem kiban wan kumba la kren u Myllung,” u la ong.
“Aiu un ai u Modi sha ka jylla bad kiei kiban pynmyntoi na bynta jong ngi kan kut tang ha ka jingkhmih lynti haba wat ki seng Bhalang kiba kwah ban pynsngew ïa ki jingeh ka jaidbynriew kim ïoh lad ban leit kynduh kat kum ka khubor ba la pynmih ha u Mawphor,” u la kren bynñiaw.