Shillong, Jymmang, 06: Ki nongleit jingleit kiba dap da ka jingbitar ki la khñium halor ka jingpynsangeh ïa ka jingpynher liengsuiñ jong ka Flybig Airline na Shillong Airport sha Delhi.
Ha ka jingïakren bad u Mawphor, uwei u nongleit jingleit uba shong basah ha Shillong, u bym kwah ban pynpaw kyrteng u la pynpaw ïa ka jingsngewsih halor ka jingpynsangeh syndet jong ka Flybig Airlines ban kit ïa ki nongleit jingleit.
“Baroh shikatto, ngi la kmen ban tip ba ka Flybig Airline ka la sdang biang ïa ka jingpynher liengsuin na Delhi sha Shillong bad na Shillong sha Delhi. Hynrei ka long pat kaba pynlynngoh ïa ngi ba ka bai tiket ka la kiew shaba palat haba ngi wad jingtip ka long ba kan ym lah ban kiew palat T. 7000 bad ïa ka liengsuiñ lah hap pynsangeh da ki kynta na ki daw ki bym lah ban tip,” ong une nongleit jingleit uba la thmu ban leit sha Delhi.
U la ong ba mynta ka sngi Thohdieng ka Flybig ka la pynsangeh syndon ïa ka liengsuiñ bad kane ka pyni ïa ki dak ki shin ba kane ka Airline kan sa leh biang kumba long ha u snem baladep ha kaba bun ki liengsuiñ kan pynsangeh.
“Nga kwah ban buh jingkylli ruh ba balei ka Sorkar kam shimkhia halor kane ka jingleh jong ka Flybig Airline. Jin lada ka long ha kane ka dur, kan jin da la bha ïa ka Sorkar ba kan ailad noh ïa kiwei kum ka SpiceJet kaba don la kajong ka Aircraft Q 400,” u la ong.
