Khmih lynti ki nongrep ban lah pynmih mar rep baroh saw aïom nangne shakhmat

Khliehriat, Naitung 07: Ha ryngkat ka jingïa don lang haduh 70 percent ki nongrep kiba dei ruh ki dkhot jong ka Self-Help Group (SHG) la plie bad pyntreikam ïa ki kor ki bor ban phah um ne pynpoi um sha ki jaka rep lane Irrigation Project ba la tip kum ka Solar Water Pump kaba la shna ha ka jinglut kaba T3.05 lak tyngka bad la bei tyngka lang 50 percent da ka KFW, kaba dei ka German development Bank bad ka Meghalaya State Rural Livelihoods Society (MSRLS) bad ka Meghalaya Basin Development Agency (MBDA) ka dei ka tnat kaba peit bad pyntrei ïa kane ka project pynpoi um sha ki jaka rep ha shong Cham Cham.
Khyndiat shaphang ka shnong Cham Cham, East Jaiñtia Hills District, kane ka shnong ka jngai 18 kilometer na Headquarter Khliehriat, ka dei ka shnong kaba ki briew ki rep ki riang bad ka dei ruh ka shnong ba don ki jaka jngohkai pyrthei kiba paw bha kum ka kshaid Rynji, ka Sahksaw bad kiwei kiwei.
Ïa kane ka solar pump ne ka Irrgation la aiti ban pyniaid da ka Ïaseinlang Village Organisation (VO), kaba dei kawei na ki kynhun jong ki nongrep ha ka thaiñ bad ïa ka pump la buh ha ka jaka jong i kong Nilam Phawa, iba dei ka Internal Community Resource Person (ICRP) i ba peit ban bishar ïa ka rep ka riang ha ka thaiñ
Katei ka Solar Water Pump ka lah ruh ban pynpoi um sha ki jaka rep wat ha ki por bym dei ka aiom ban thung jhur kum ha ki aiom ba rang bad kane kan iarap shibun eh ïa ki paidbah nongrep ba ki lah ban rep ha baroh ki aiom.
Katei ka pump ne ka jingpynpoi um kan long ruh ka jingmyntoi wat ïa kito ki phra tylli ki SHGs kiba don hajan shnong Cham Cham kiba im da ka rep ka riang ha kaba ka um kan poi wat sha ki jaka rep jong ki ruh ha ka por ba rang ba rkhiang.
Na ka liang ka tnat MBDA haba ka buh ïa katei ka project kaba heh ha shnong Cham Cham, ka Solar Water Pump, ka don ruh ka thong bad ka jingthmu kaba hakhmat eh ym tang ban kyntiew ïa ki nongrep bad ïa ka rep ka riang hynrei ban kyntiew ruh ïa ka ïoh ka kot jong ki nongshong shnong ha kaba ki lah ban shim ïa ka kam ban rep ban riang kum ka lad kamai ha baroh saw aiom ha ka thaiñ.
Ka kong Nilan Phawa, kawei na ki nongrep kaba na ka shnong Cham Cham kaba dei ruh ka dkhot jong ka Ïahluti SHG kaba hapoh ka San Shnong CLF, ka la pynpaw ka jingsngew kmen halor ka jingioh ïa kane ka project pynpoi um sha ki jaka rep bad ka la ong “ Kane ka solar pump kaba ngi la ioh ngi lah ban pyndonkam ha ki kper ba ngi rep bad ngi lah ban ioh um ruh wat ha ka por ba rang ba rkhiang, ne ha ka por tlang, na kane ka pum ngi lah ruh ban tan um shaduh sha ki kper rep ha kaba ngi lah ban pyndonkam ruh ïa ka um wat ha ka por ba ngi shna sboh bad ha ka por ba thung ba tep, mynta wat ïa ki symbai ruh ngi la ioh ban thung ha ka por ba biang bad ngi la ju ioh jingiarap da ki symbai na ka Meghalaya State Rural Livelihood Society bad ruh na ka tnat ka rep ka riang (Agriculture) ruh ngi ju ioh jingiarap kumjuh ruh na ka tnat Horticulture, don ruh ki por ba ngi hap ban thied ïa ki symbai ban thung”
“ Mynshwa ngi shem jingeh bha khamtam ha ka por ba duna slap bad ha ka por tlang ha kaba ngi hap ban leit tong um bad kit ha met, ha khlieh bad rah um ha kti na ki jaka ba jngai ban ai um ïa ki jingthnung bad ban shna sboh, nga ai khublei ïa ki lai tnat, ka KFW, kaba dei ka German development Bank bad ka Meghalaya State Rural Livelihood Society (MSRLS) bad ka Meghalaya Basin Development Agency (MBDA) kiba la kyrshan ïa ngi ki nongrep bad pynsuk ïa ngi ki nongrep bad ngeit ba ngin lah ban kyntiew ïa ka rep ka riang nangne shakhmat” la bynrap ka kong N.Phawa.