Khmih lynti ka Meghalaya ban khur bun ki takma na ka Karate bad Table Tennis ha ka North East Olympic

Shillong, Naiwieng : Ka Meghalaya ka don ka jingkyrmen ba kan ïoh ban khur bun tylli ki takma na ki ar tylli ki jait jingïalehkai, kata ka Karate bad ka ruh ka Table Tennis na ka lympung ïalehkai jong ka North East Olympic Games 2022 kaban long naduh ka10tarik mynta u bnai.
Kumba long haduh mynta hi, ka Karate kadei kawei na ki jingïalehkai kaba pawnam bha ha ka pyrthei bad ka Meghalaya ruh ka don ïa ki nongïalehkai kiba kynsai kiba la dep ruh ban mih khmat ïa ka jylla wat ha ka ri bad wat sha ki lympung ba heh ha ka Ri ha ki snem ba la dep.
Hapoh ka jingïalam jong u Bah Donboklang Lyngdoh, ki nongïalehkai Karate ka jylla ki la kilan met tyngeh ha kine ki ar bnai ba la dep.
U Bah Donboklang uba dei ruh u Competition Manager ha ka jingïalehkai Karate ha katei ka lympungbah jong ki jylla ka thain shatei lam-mihngi ojng ka Ri, u la ong ba ki nongïakhun na ka jylla kiba bun ki dei kiba 17 snem shaneng.
Ka kynhun ïalehkai Karate ka jylla ka kynthup ïa ki 28ngut kiban shim byna ha baroh ar tylli ki jait jingïalehkai (form and movement) bad kumite (bouts). La khmihb lynti ruh ba ka Arunachal Pradesh, Sikkim bad Mizoram kin shim bynta lang ha katei ka lympung bad ban ai ka jingïakhun kaba itynnad bha pyrshah ïa ka Meghalaya kaba dei ka trai jylla ban pynlong ïa katei ka lympung.
Kawei na ki nongïalehkai ba la paw bha na ka jylla kadei ka samla Ester Mary Lyngdoh kaba la don bynta bad katei ka jait jingïalehkai naduh u snem 2000 ha ka por ba ka dang don 12 snem ka rta.
“Ka jingpynkhreh ka la ïaid shakhmat mynta bad ngi kyrmen ba ngin ïoh ba khur bun tylli ki takma ksiar,” ka la ong.
Ka Meghalaya watla ka la kiew stet ha ka lympung ïalehkai ha kine ki khyndiat snem hynrei kito ki nongïalehkai Karate ne wat kiwei ki nongïalehkai wat hadien ba ki la ïalehkai bha ki ju ïoh tang kumba 10,000 tyngka lada ki khur takma ksiar ruh. Hynrei mynta ka don ka jingkyrmen nama rkane ka sorkar ba mynta ka la sdang ban kyntiew shuh shuh ka rukom ai bai burom ïa kito kiba wanrah takma bad ai mynsiem ruh ïa ki nongïalehkai ban ïalehkai kham bha.
Haba ïadei pat bad ka jingïalehkai Table Tennis, don kawei ka nongïalehkai kaban ïakhun ban pynneh ïa ka nam lahduh ha ka lympung Women’s Singles naduh ba ka leit ban aireng ha Manipur ha ka NEOG ha u 2018, ka Tanushree Dasgupta.