Khmih lynti ban wan bei pisa ki riew shimet haduh 5600 klur tyngka bad kan ai kam 5500 ngut ong u CM

Shillong, Rymphang 25 : Ka Jylla ka la pynkhreh ban sakhi ïa ka jingkiew ba khraw ha ka jingwan seng kam ki riew shimet, bad ka Sorkar ka khmih lynti ïa ka jingwan tuid ka pisa ba 5600 klur tyngka ha ki snem ban wan, ka ban pynioh kam ruh ia palat 5500 ngut ki briew, ong u Myntri Rangbah ka Jylla u Conrad K Sangma ha ïing Dorbar Thaw Aiñ ha ka Sngi Balang.
“Ngi khmih lynti sa 2638 klur tyngka ban sa shim rai shen. Hapoh kine ki arsnem ban wan, ngin jam top sha ka 5600 klur tyngka ka jingwan bei tyngka ha Jylla, ïa kaba ngi khmih ba kan plie ïa ka lad aikam aijam haduh 5500 ngut, bad bun na ki, kin dei ha ki kynja hotel baheh baheh ong u Conrad haba jubab ïa ki jingïatai halor ka mang tyngka ha ïing Dorbar Thaw Ain.
U Myntri Rangbah ula pynpaw ïa ka jinglah ka Jylla ban kyntiew ïalade ha ka kam thung siej, haba pyntip ïa ka jingwad bniah bala leh da ka MBMA.
“Ka MBMA kala pynlong ïa ka jingwad bniah halor ka kam thung siej kiba don ha Meghalaya. Haba ki pule ïa ka kaiphod, ki la kmen bha namar ki jait siej ba ki wad ki dei kiba shem ha Meghalaya bad kane kan plie ïa ka lad seng kam ba jan kot 2000 klur tyngka hangne” ula ong.