Khliehriat, Naitung, 23: Ki nongïalam bad ki dkhot jong ka Khasi Students Union Narpuh Circle lem bad ki Waheh Shnong jong ka thaiñ Narpuh, ha ka jingialang ba kyrpang ba la pynlong ha hotel Sweet Chile ha Mynkre, ki la ïakren shaphang ka jinglong jingman ka surok national highway ha Narpuh (NH-6) kaba la julor bad sniew shaba palat bad ong ruh ba Ka KSU Narpuh Circle lem bad ki Waheh Shnong na Narpuh kin sa shim ïa ka synjam kaba tyngeh ban leh da ki kam lada ka sorkar bad ka NHAI ki dang leh mynthi ban maramot ïa ka surok NH-6. La ong ruh ba kin sa leit ruh ban ïakren bad ki heh jong ka NHAI kumjuh ruh bad ki bor sorkar ban dup tip shai ïa ka daw ba balei haduh katne-katne ka jingshah ïuhroit bad jingshah ieh beiñ ka thaiñ ha ki liang baroh, naduh ki surok, ki lynti syngkien bad kiwei kiwei ki kam pynroi ban kyntiew ïa ka thaiñ, khamtam eh ha kaba ïadei bad ka surok. Ha ka jingïalang, ki la shim ïa ka rai ba hadien ka jingiakynduh bad u Deputy Commissioner ka East Jaiñtia Hills District kumjuh ruh bad ki heh jong ka NHAI, lada ki dang sngap kuman, katei ka kynhun na Narpuh kan sa pyni da ki kam, ki paidbah baroh baroh kiba ïaid lyngba na kane ka surok national highway ki ïohi bad ki sakhi ruh ïa ka jinglong ka surok bad ruh ki ju iakynduh jingeh ha ka ïaid ka ieng khamtam haba lap ka pang ka shitom. Ha katei ka sngi, ïa ka jingialang la pynïaid da u President KSU Narpuh Circle, u bah K.S Suchiang ha ka jingdonlang ki dkhot bad ki rangbah shnong jong ka thaiñ.