Shillong, Nailur 03 : Ka Meghalaya ka khlem shim bynta satia ha kane ka samoi ïalehkai jong u 2024-2025 ha ka lympung ïalehkai jong ka Senior Women’s National Football Championship, kaba ïa ka jingpynïakap ïa ki kynhun ïalehkai ka jylla ladep ban pynbeit ha kane ka sngi Nyngkong.
Kumban shu phai dien, ha ka samoi ïalehkai jong u snem ba la dep ka Meghalaya ka la shah rem baroh saw tylli ki jingïakhun sdang ha ka group.
Ha kane ka lympung ka Manipur kadei kaba la bat bunsien bha ïa ka nam lahduh bad ha u snem ba la dep ka la ïoh ban pynliem noh ïa ka Haryana ha ka final kaba long ha Kolkata. Kumta kine ki ar tylli ki kynhun kin ïoh rung da kaba suk sha ka kylla kaba khatduh ryngkat bad ki phra tylli kiwei pat ki kynhun kiba hakhmat eh na ki jingïakhun sdang ha ki group bapher bapher.
Mynta u snem baroh ki don haduh 31 tylli ki kynhun kiba pynkhreh ban aireng kawei ïa kawei pat ha ka group stage bad ïa kine la phiah ha ki 7 tylli ki group kaba don saw tylli ki kynhun bad kawei pat ka group kaba don tang lai tylli ki kynhun.
Ki kynhun kiba kham paw ha kane ka kynti kata ka Tamil Nadu, West Bengal, Railways, Delhi, Punjab, Odisha, Sikkim bad Jharkhand ha kaba la phiah ïa ki naduh Group A haduh H. Katba ïa kiwei pat ki kynhun la phiah kumto kat ha ki group ba ki ngat.
Hadien ba la poi sha ka kylla kaba ar, ki phra tylli ki kynhun ba hakhmat kin don lang bad ka Manipur bad Haryana ha kaba yn phiah pat ïa ki ha ki ar group kaban don mar san tylli ki kynhun. Na kine, ar tylli ki kynhun kiba hakhmat na kawei ka group kin ïoh rung pat sha ka semi final.
Ki kynhun kiba don ha ka Group A ki kynthup ïa ka Tamil Nadu, Himachal Pradesh, Kerala, Goa
Group B: West Bengal, Karnataka, Jammu & Kashmir, Bihar
Group C: Railways, Uttar Pradesh, Andhra Pradesh bad ka Assam
Group D: Delhi, Maharashtra, Pondicherry, Andaman & Nicobar Islands
Group E: Punjab, Chhattisgarh, Rajasthan, Uttarakhand
Group F: Odisha, Madhya Pradesh, Arunachal, Ladakh
Group G: Sikkim, Chandigarh, Tripura, Gujarat
Group H: Jharkhand, Telangana, Mizoram.
