Khlem pyndem u kyrtong ka UDP ha ki Karbi kiba phah pynsangeh ïa ka jingïalang ha Mokoiram

Jowai Rymphang, 11: U kyrtong ka United Democratic Party (UDP) na Mynsngat-Khanduli u Bah Damian S War ha ka sngi Baar um shym la pyndem satia hakhmat ki jaidbynriew Karbi kiba la dawa ban pynsangeh ïa ka jingïalang ïalap elekshon jong u ha ka shnong Mokoiram, West Jaiñtia Hills District, ka jaka kaba dang don ha khappud Meghalaya-Assam.

Ki briew kiba la kam ïalade ba ki dei na ka thaiñ Karbi Anglong ki ong ba kim shah ban pynlong ïa kane ka jingïalang namarba kane ka jaka ka hap hapoh ka West Karbi Anglong Distic, Assam hynrei u Bah Damian S. War ryngkat bad ki nongkyrshan jong u kim shym la ailad ïa ka jingwan tuklar bym don nongrim jong kine ki briew.

Namar ka jingpyneh bad ka jingbym pyndem jong u Bah Damian bad ki nongkyrshan, ki Karbi ki la hap phet bad leit phai tipsngi noh sha la shnong.

Haba kren ha ka jingïalang u bah Damian u la ong, ha i bor iba rit u lah dep ban trei borbah kum u nongïalam sengbhalang ban ïada ïaki paradoh parasnam khamtam ïa ka khyndew ka shyiap ha ka thaiñ Khappud bad mynta u la rung sha ka jylli saiñpyrthei ryngkat bad ki nong kyrshan jong u ban bteng ïa ka jingshakri ïa ki paidbah.U la kyrpad ïa ki paidbah jong ka shnong Mokoiram ba kin ai ka jingkyrshan ïa u bad ba kin buh lem ha ki jingduwai na ka bynta ka ri rilum Jaiñtia.

U la kyntu ïa ka shnong Mokoiram ba kim dei ban duh jingkyrmen ba sa shisien ka sngi kin sa jop ïa kine ki jingeh kiba shah hakhmat lyngba ka jingtrei shitom lang ban ïada lang ïa u pud u sam.