Shillong, Nailur, 03: U President jong ka Meghalaya Government Lower Primary School Contractual Teacher’s Association (MGLPSCTA) u Bah Birbor Riangtem u la pynbna paidbah ba un pynlong da ka jingshong shah thngan kaba khlem pud sngi hakhmat ka ophis treikam Meghalaya Secretariat, Shilllong naduh ka 7 tarik mynta u bnai ha ka por 11:00 baje mynstep ban pynbor ïa ka Sorkar Meghalaya Democratic Alliance (MDA) ba ïalam da ka National Peoples Party (NPP) ba ka dei ban pynrung kam biang ïa baroh ki nonghikai skul kontrak kiba la shah wengkam naduh u bnai Kyllalyngkot, 2021.
Ha u kyrwoh ba la phah sha ki lad pathai khubor u Bah Riangtem u la ong, “lada ha ka Jylla Punjab bad ha ka jylla Assam ka Sorkar ka kloi ban thungkam pura (regularise) ïa ki nonghikai kontrak bad ïa ki nongtrei kontrak ha ki ophis Sorkar hynrei balei ka Sorkar kam lah ban leh kumjuh ha jyllla Meghalaya.”
Une u nongïalam jong ka MGLPSCTA ha ka jingïakhih kaba khlem pud sngi ba la pynlong ha nongbah Shillong ha ka 5 tarik u Nailar, 2022 u la aiti lut ïa ki Dulir sha ka Sorkar Jylla lyngba u Magistate hadien ba kane ka kynhun ka la hap ban pynkut noh ïa ka jingïakhih hadien ba u Myntri Rangbah ka Jylla u Conrad Kongkal Sangma u la kren da kaba shai sha ki nongïalam jong kane ka kynhun ba ka Sorkar kam don lynti shuh da kumwei pat ban dang pynrungkam ïa ki nonghikai kontrak kiba la shah weng na ka kam.
Haba pynpaw ïa ka daw kaba la pynlong ïa u ban shim da kane ka sienjam, u Bah Riangtem u la ong, “namar ka jingbym shimkhia jong ka Sorkar ngam banse ban mih shakhmat ban pynlong da ka jingshah thngan hakhmat ka Secretariat.”
