Khlem patiaw ki karkhana, ka sorkar bad ka tnad MSPCB ka dei ban leh da kaba tyngeh

Nongpoh, K’Lyngkot 02 : Ka thaiñ Byrnihat kaba la iohnam ruh kum kawei naki shnong kaba jaboh tam ka lyer haka ri India katkum ka kaiphod jong ka Centre for Research on Energy and Clean Air bala pynbna ha u snem bala dep, ki nongshong shnong ba sah marjan bad ki karkhana haka thaiñ Byrnihat khamtam haka shnong Dehal Bagan kila ud la nam, hadien ka jingsma kaba shyrkhei bad ka tdem ba mih naki karkhana ha katei ka thaiñ kiba trei shimiet shimiet khlem shongthaid khlem da sngap ïaka jingud jingnam ki paidbah.
Kum ban pynkynmaw hangne ba u nongthoh khubor jong U Mawphor ha u bnai Kylla Lyngkot jong u snem bala dep u la hiar sha ka thaiñ Byrnihat ban sakhi dala ki jong ki khmat ïaka jingud jingnam jong ki paidbah bad ban pynpaw pyrthei ba kumno ki paidbah ki im ha katei ka thaiñ hapdeng ka tdem pum pum ba iong ngaiñ ngaiñ kiba sop lut ïaki iing ki sem bad ki jingthung jingtep, hynrei ki paidbah kane ka thaiñ lyngba ki dur ki dar kila pyntip biang ba kitei ki karkhana kim shym la shongthaid bad pynduna ïaka jingpynmih tdem hynrei ryngkat ka jingsma bad ka tdem ba iong ngaiñ ki paidbah ki hap ban im sohsat ha katei ka thaiñ kaba buh ïaki paidbah hapdeng ka jingma kaba khraw namar ki don ruh kiba la don lypa ka jingshitom bad lada ki ring mynsiem sa katei ka jingsma bad ka tdem kan nang ktah shuh shuh ïaka koit ka khiah jong ki khamtam ki khyllung khynnah.
“Tang kiba mad kiba sngewthuh ïaka jingeh bad kiwei kiba im hapdeng ka lyer khuid kin nym sngewthuh ïaka jingeh kaba ngi mad baroh shi katta” la ong uwei u samla haba kren bad u nongthoh khubor bad kane ka dei ka kamram jong ka sorkar bad ka tnad MSPCB ban leh da kaba tyngeh ïa kitei ki karkhana kiba jur ka jingpynmih tdem jaboh kaba la ktah shi katdei ïaki paidbah ka thaiñ, namar kila ïathuh ruh ba haka por ba ki ophisar ka tnad MSPCB ki leit ban jurip ym ju mih tdem hynrei mar sien mih maki tang katto katne kynta la sdang mih biang ka tdem iong na atoskhana.
Naduh ki kwai ki tympew, ki soh ki pai bad ki jingthung jingtep, kila sop lut da ki tdem pui pui kiba rben bad kiba bitnah bad bun naki jingthung kiba jyrngam kila kylla rong iong namar ka jingrben ka tdem kaba mih kiba hap pat sha ki shnong ki thaw bad ki iing ki sem.
Lah ruh ban kdew hangne ba tang hadien ka jingmih khubor ha u snem bala dep ki ophisar ka tnad MSPC kila hiar sha katei ka thaiñ ban leit jurip bad khangdam ruh bun ki kharkhana kiba pynkheiñ aiñ ryngkat ka daiñ kuna, hynrei tang hadien katto katne por ki karkhana kim patiaw eiei hynrei kila sdang biang ban leh kumba ju leh kumba la sakhi ruh da ki paidbah nongshong shnong bad lyngba kane ka khubor kan long ka jingpynkyndit thiah ïaka sorkar bad ka tnad MSPCB ba ka dei ban leh da kaba tyngeh ban ailad ïaki paidbah ban im hapdeng ka suk ka saiñ bad ka khuid ka suba.