Mynta la shitaïew tam eiei ba U Himanta Sarma, Myntri Rangbah ka Assam, ula khlei juban lak hakhmat ki nongïalam ka Karbi Anglong, ba ka Block I bad Block II, ki hab hapoh u pud u sam jong ka Karbi Anglong Autonomous Council (KAAC) bad ba u kren ruh ïa ka jingpynbna, kaba ha u snem 1951, nangta ba u kular ban buh da ka battalion kaba junom ha Tapat lane ha Lapangap bad kitei ki kyntien, ki la pyntyrsaiñ jur imat ïa ki heh nongïalam ka jylla, naduh ki 3 ngut ki MP, khamtam ïa ki arngut ki MP Khasi, U Dr Ricky Syngkon, U Dr WR Kharlukhi bad kumjuh ïa U Conrad Sangma, Myntri Rangbah ka jylla ha ryngkat lang lem bad ki arngut ki symbud Myntri Rangbah jong u.
Ym don wat tang uwei uba nud ban ang la ka shyntur, wat tang ban pynkynmaw ïa kato ka soskular jong u snem 2022, kaba la dep aiti sha U Amit Shah Myntri Kam Pohïing jong ka sorkar India, kaba ong ba ka jingpynbeit pud kan peit na ka jingbit jingbiang ka synshar khadar, ka jingdon ki nongshong shnong, ka ktien ka thylliej bad sa shibun kito ki kyndon kiba la ïateh hapdeng ki arliang sorkar.
Kane ka jingsngap jar jar jong ki MP ka jylla, ka pyni, kumba kim nud satia ban ang ïa la ka jong ka shyntur, halor kitei ki kyntien kob sarong U Himanta Sarma lane ba kin ujor mar mar sha ka sorkar India, halor ka jingïateh jong ka sorkar India bad ki Hima Khasi bad nangta halor ki jaka puta, kiba la ju hab ha u pud u sam jong ka Khasi bad Jaiñtia District Council bad katei lei ka jingkren, ka la jrong thylliej tasam bha, ha kaba ka Assam, ka la poi syndon sha Lapangap, kaba dei ka jaka kaba ju thep vote sha Meghalaya bad kaba kine ki Nongïalam, ki la ju kam trai, ba ka dei ruh ka bym don jingïakajia pud satia naduh mynshwa ne naduh ba la ïoh ïa la ka jong ka jylla Meghalaya ha ka snem 1972.
Ka jingkren U Himanta Sarma, ka la pynkut noh ïa ka jingïasoi soskular, ha u snem 2022, namarba ka pyni pleng, ba kam don shuh ka jingïapynbeit pud hapdeng ki ar jylla, hynrei ka dei tang ka jingshim jaka kaba ka Assam ka thmu bad ba ka la jop, ha ka bynta kaba nyngkong ban ïohei haduh 19 square kilometre na ka sorkar Meghalaya.
Ngim tip ïa kaei ka jingmut kaba don ha U Conrad Sangma, Myntri Rangbah ka jylla lem bad ka kynhun jong u bad kumjuh ïa kine ki arngut ki MP, hynrei na ka jingkren u Myntri Rangbah ka Assam, ka la paw shai ba ka por, ka la dei ba kin leit noh mar mar sha Delhi ban dawa ba ka jingïakren kam pud ka dei ban long, lyngba ka jingpeit jong ka sorkar India lem bad ka jingpeit ïa ki kot ki sla, kiba don jingïasnoh naduh u snem 1948.
Ka long ruh kaba i sammut, ba haba ki nongshong shnong ka Lapangap, ki mad ïa ka saw ka sian, ha ki khyndiat sngi ba ladep, ym don satia ki heh sorkar jylla, ki ban leit ai mynsiem ïa ki, kumba ki la leit kyndang ïing wat mynmiet mynïong ruh sha thaiñ Ribhoi, ha ki sngi sdang pynbeit pud ha u snem 2022.
Ha kato ka por ne ka snem ba ki heh Sorkar ne ki dkhot jong ki committee ne ki regional committee ba ïa pynbeit pud ki la pyni ba kumba kida angnud shisha ban pynbeit noh ïa u pud u sam kumba ki la kam ba ym pat ju don kiba ïa pynbeit pud naduh ki por 50 snem mynshwa.
Haba ïohi ba ki Myntri kane ka Sorkar ki la leit ban kyndang ïa ki shnong ki thaw bad ban jngoh ïa ki jaka puta ne wat ban kren sha ki paidbah ne pan ka jingmynjur jong ki la ki kwah ban hab sha Meghalaya ne sha Assam khnang ba kin lah ban pynbeit noh ïa u pud u sam uba dei ban neh shi syndon shirta hapdeng kine ki arjylla.
Hynrei kumba ïuh tdong bseiñ kane ka jingkular imat la ïohi kumba la dep ban ïa pynbeit lypa ruh ïa ka Lapangap ba kan hab noh sha u pud u sam ka Assam.
Ïa kane la ïohi bad paw tyngkreiñ ba ka Sorkar Meghalaya kam don mon satia ban ïada iala ki jong ki paid ki nongshong shnong ha Lapangap hynrei na ka liang ka Sorkar Assam pat ka phah pahara syndon da ki pulit ïa ki paidbah Karbi kiba kam ïa katei ka jaka bad kiba pynthut, pyndik ïa ki Nongrep ki Pnar bad Khasi ba kin leit ot ïa u kba ba ki la bet bad rep.
Lehse kane ka jingailad mynta ruh ba ki shah ban ot ïa u kba ka lah ban don kaei kaei kaba sha lyndet, to ngin ïa peit pat sa kaei ka ban dang jia nangne shakhmat bad ha kano ka rukom ruh ba ka sorkar jylla kan shim khia ïa kane ka kam kaba long ka iap ka im jong ka jylla bad khamtam ïa ki jaitbynriew Pnar bad Khasi kiba im bad kamai kajih bad khamtam kiba im ban kamai jakpoh da kaba shu rep shu riang ha kane ka shnong Lapangap bad kiba bsa ruh ïa la ki jong ki longïing longsem na kane ka khyndew ka shyiap kaba seisoh shibun bha.
