Khlem pat ïoh jingbit, tei be-aiñ ka NPP ïa ka ophis: Disparsing Rani

Shillong, Nailur 14: U Bah Disparsing Rani u nongwad jingtip ba pawnam lyngba ka RTI ha ka sngi Balang u la ong ba ka jingpynieng ka NPP ïa ka ophis jong ka ha ka jaka ba don marjan bad ka ïingsah jong u Chief Justice jong ka Meghalaya High Court la shu tei be-aiñ namar kat kum ka jingtip kaba u la pan ïa ki kot ki sla bad ki jingai jingbit na ka Deputy Commissioner jong ka East Khasi Hills kam ah satia ban ai ïa ka building permission bad kumjuh ka jingbit ban ot ne pynkhyllem ïa ki dieng kiba don ha katei ka jaka.
Haba kren sha ki lad pathai khubor u la ong ba kat kum ka kyndon jong ka Buliding By-law bad kumjuh ruh ki kyndon jong ka lease agreement ba la ïa soi hapdeng u DC bad ka NPP bad kumjuh kiwei pat kiba ioh jaka na ka sorkar ha ki jaka sorkar ne Revenue Land ka la kdew shai ba kine kiba shim wai ïa kane ka jaka kim lah ban tei ïing khlem da la ioh ka jingbit shuwa na ka ophis DC kaba dei ka nongri nongda jong kine ki jaka sorkar.
U la ong ba na ka liang jong u u la pan jingtip lyngba ka RTI ha kaba u pan ïa ki Xerox copy jong ki kot ki sla kiba donkam ban ioh ha shuwa ban sdang trei ïa kane ka ophis hynrei na ka liang jong ki ki la shu kdew beit ïa ka tarik ba ki la ai jingbit ba ki la ai sha ka NPP hynrei na ka liang ka ophis kam shym la lah ban ai kumba la pan ha ka RTI. “Dei kane ka jingbym lah ban ai ïa ki kot ki sla ba ka pynphalang ba ka NPP kam pat ïoh satia ïa ka building permission” u la ong.
U la ong ba kiwei ki kot ki sla kiba donkam la ai lut sha ka ophis DC ha kaba na ka liang jong u ruh u la ioh ïa ka Xerox kat kum ka jingpan jingtip jong u.
U la ïathuh ruh ba kat kum ka Agreement kaba ki la soi hapdeng ka ophis jong u Deputy Commissioner la ai wai ïa kane ka jaka kaba ka jingheh kaba 10 Akar sha ka NPP na bynta 30 snem ha ka dor ba 115 tyngka shisnem.