Shillong, ïaïong, 09: Ki nongïalam jong ka United Hynniewtrep Movement (UHM) ha ka sngi Thohdieng ki la hiar jurip ïa ki dukan jong ki bar jylla ha Ïew Balat, ka shnong kaba don ha khappud bad ka ri Bangladeh, bad lap ba bun na kine ki dukan kim don satia ïa ki kot ki sla kiba biang bad don ruh kiba la ïoh ïa ka laisen na ka Khasi Hills Autonomous District Council (KHADC) kim shym la pynthymmai satia.
Ka seng hapoh ka jingïalam jong u President u Bah Charlie J. Rani lem bad ki dkhot jong ka UHM Balat Border Area Zone ba kynthup ïa u President u Bah Ïaidshaphrnag Syiemlieh bad u General Secretary u Bah Mawshan Lartang ki la khang khyrdep ïa ki dukan jong ki bar jylla ki bym don ïa ki kot ki sla kiba biang bad maham ruh ba kim dei satia ban plie ïa ki dukan tad haduh ba kin da ïoh ïa ka Trading License kaba biang na ka District Council.
“Ha kane ka jinghiar jurip kyndit, ngi lap ba bun na ki dukan jong ki bar jylla kim don satia ïa ki kot ki sla kiba biang kum ka Trading Lisense bad wat kito kiba don ïa ka laisen kim shym la leit pynthymmai satia hapoh ka District Council, hynrei kki la aidaw pynban ba ki la aiti ha ki katto katne ki Agent ban leit pynthymmai ïa ka laisen,” ong u kyrwoh ba la phah da u Bah Charlie J. Rani
“Halor kane ka nongrim, ngim don lad shuh da kumwei pat hynrei sa tang ban shu khang khyrdep beit ïa kine ki dukan ki bym don ïa ki kot ki sla kiba biang bad ngi la maham ruh ba kim dei ban plie ïa ki dukan tad hdauh ba kin da ïoh ïa ki kot ki sla kiba biang na ka Council,” ong une u nongïalam ka Seng.
“Ngi kwah ban kyntu ruh ïa ka District Council ha kano ka rukom la ai ïa ka Trading Lisense sha ki nongshong dukan namarba katkum ka kyndon Trading by Non-tribals Regulation Act 1954 ka la kdew shai ba yn ym lah ban ai ïa ka Trading License sha kino kino ki bar jyla lada ka dei ka kam kaba lah ban trei hi da ki trai jylla. Halor kane ka nongrim, ngi pynrem jur ïa kane ka jingbym phikir jong ka tnat Trade ka District Council kaba shu shim sting ïa kane ka kam,” u la ong.
Ha kane kajuh ka sngi, katba ki dkhot ka seng ki dang ïaid lynti na Shillong sha ka shnong Balat ki la ïohbat ïa kawei ka kali kaba don ïa u number AS11DC-7898 na ka jylla Assam kaba kit ïa ki nongbylla bar jylla khlem ki kot ki sla kiba biang ban leit buh sha ka shnong Balat.
Hadien ka jingtohkit, ka seng ka la beh lut ïa kine ki nongbylla bar jylla bad phah leit phai biang sha ka jaka kaba ki wan khlem da ailad hi ruh ba kin leit sha ka shnong Balat.
“Ngi kwah ruh ban buh jingkylli ïa ka tnat Anti-Infiltration jong ka tnat Pulit kaba don ha Mawngap bad ha Mawsynram hato ki leh aiu. Hato kam dei ka kamram jong talasi ïa ki kali kiba kit ïa ki nongbylla bar jylla ne ki tip tang kumno ban ñiew pisa? la kynthoh une u nongïalam ka Seng.
Ka Seng ka la bthah ïa ka shnat treikam jong ka Tyrsad Circle bad ka Balat Border Area Zone ban long kiba peitngor halor ka jingwan rung jong ki briew kiba nabar.
“Ngi kyntu ïa ka Sorkar Jylla, lada kam lah pynbor ïa ka Sorkar Pdeng ban pyntreikam ïa ka Inner Line Permit ha kane ka jylla, ngim donlad shuh da kumwei pat hynrei sa tang ban shu shim hi ïa ka aiñ ha ka kti,” u la ong.
