Khlem kyntait u Bah Lahkmen ïa ka jingshisha ba don ki briew ba thmu rung tuh sha India

Shillong, K’Lyngkot 9: U Myntri Sorkar ba peit ïa ka tnad pule puthi u Bah Lahkmen Rymbui u la ai ka jingïaroh ïa ki nong shong shnong ha ka thain khappud India-Bangladesh, ki pulit ka jylla bad ki shipai ïada khappud ki Border Security Force ba kin pyntina ba ki nongrung tuh kin ym ïoh lad ban rung shapoh ka ri India lyngba ka jylla Meghalaya na ka daw jong ka jinglong jingman hapoh ka ri Bangladesh.
Haba ïa kren bad ki lad pathai khubor u Bah Rymbui um shym la kyntait ïa ka jingshisha ba ki don ki briew kiba pyrshang ban rung bad prong tuh sha kane ka ri lyngba ka jylla Meghalaya.
Da kaba kyntu ïa baroh ban long kiba husiar, u Bah Lahkmen u la ong ba ka long kaba sngewsih ïa ki katto katne ki kynhun hapoh ka jylla kiba leh kum ki nongpynïaid ne ki nonglam lynti ban pynsuk ïa ka jingwan rung tuh ki nong Bangladesh sha kane ka jylla.
“Ka sorkar ka pyrshang ban khanglad (ïa ki nong Bangladesh ban rung).Hynrei ki don ki katto katne ngut ki briew kiba pyrshang da kaba shim kabu ïa ka jinglong jingman ha Bangladesh bad ki shim pisa haduh T. 20,000 haduh T.30,000 hajar”, la ong u myntri.
Hynrei u la ïaroh ïa kiwei pat kiba la pyntip sha ki bor ba dei peit bad kum kine ki briew kiba rung tuh ki la shah kem noh.
U bah Rymbui u la kyntu ïa uwei pa uwei u nong India, haba ïohi ïa ka jinglong jingman ha Bangladesh, ba kin long kiba ïatylli bad ban peit ba kin ym don ki riew beain kiba wan rung beain shapoh ka jylla Meghalaya.
Haba kdew ïa ka jingshahkyndang ha Assam, pyrshah ïa ki khar Bangladesh, bad ka Summary Intensive Revision ha ka jylla West Bengal, u bah Rymbui u la kyntu ïa baroh ki sordar bad kumjuh ruh ïa ki rangbah shnong bad ïa baroh ki nongïadon bynta lang ha ka jylla ba kin long kiba husiar khnang ba ki briew kiba thmu wan buhai shnong beain kin ym ïoh jaka sah ha Meghalaya.