Khlem ing ka jingkieng ha Wah Umler, shu shah pharep ki samla Khasi ha ki Pulit Assam

Shillong, ïaïong, 15: Ka jingshahkem jong ki lai ngut ki samla Khasi na ka shnong Sabuda, Ribhoi District ha ki Pulit ka Jylla Assam halor ka jingkynnoh ba ki thmu ban wiang ding ïa ka jingkieng ha Wah Umler ka paw ba ka dei tang ka jingpharep kaba khlem don nongrim satia.
Ïa kane la pynshisha da ka United Hynñiewtrep Movement (UHM) hapoh ka jingïalam jong u President u Bah Charlie J. Rani kaba la ïoh ka dur jong ka jingkieng ha Wah Umler ha ka jingleit hiar sha ka shnong Sabuda ha ka sngi Palei. Katkum kane ka dur la sakhi ba ym don satia wat tang iwei ruh i dak ing jong kane ka jingkieng.
Ki lai ngut ki samla Khasi kiba dang don ha ka kti jong ki Pulit Assam haduh mynta ki long u Samla Disparsing Mukhim, u Samla Stanling Khryiem, bad u Samla Barson Lawai. Ïa kine ki lai ngut ki samla Khasi kiba la shah mudui da ka ejahar ha ki Pulit jong ka Jylla Assam ki la shah tian bishar ha ka Kashari ha ka jylla Assam.
Ka jingleit hiar jong ki dkhot ka UHM sha ka shnong Sabuda ka long ban leit ai mynsiem ïa ki bahaing hasem jong kine ki lai ngut ki samla Khasi.
Katba ki dkhot ka UHM ki dang poi ha shiteng lynti ban leit sha ka shnong Sabuda ki la shah pakhang lynti ha ki Pulit ka Ribhoi District ynda poi ha PHC Bhoirymbong.
Da ka jingpynsngewthuh jong ki nongïalam ka Seng ïa u Dy. SP ka Ri-Bhoi u GN Joshi, la pyllait ïa ki dkhot ka UHM ban leit shaduh ka shnong Mawlasnai ryngkat ka jingsynran lang jong ki Pulit. Ynda la poi ha Mawlasnai ki Pulit ka Jylla Assam kim shym la ailad satia ïa ki dkhot ka UHM ban hiar sha ka shnong Sabuda.
Ha Mawlasnai ka Seng ka la pynlong ïa ka jingïalang kaba rit ha ryngkat ka jingïadonlang jong ki nongïalam shnong na ka shnong Mawlasnai bad na ka shnong Madan Umwang lem bad ki bahaing hasem jong ki lai ngut ki samla Khasi kiba la shah kem na Sabuda.
U nongïalam shnong jong ka shnong Mawlasnai u la pyntip ïa ki jingeh ba ki paidbah ki ïakynduh na ka por sha ka por khamtam na ka jingshah pynthud ha ki Pulit Assam.
Halor kane, ka UHM ka la ai ka jingkular ba kan ïai don lang ryngkat bad ki paidbah ka shnong Mawlasnai bad kumjuh ruh ban ai jingkyrshan pura ïa ki jingdawa ba ka Sorkar Jylla ka dei ban ailad ïa ki paidbah kiba sah ha ki shnong kiba don ha khappud bad ka Jylla Assam ban rejistar ei ïa ki jaka (Free Land Registration).
Na ka liang jong u Rangbah Shnong ka shnong Madan Umwang u la pynpaw ïa ka jingeh ha ka leit ka wan, khamtam haba leit sha iew sha hat bad haba leit shim dawai ha ka pang ka shitom naba ki paidbah ki hap ban da pyni ïa ki sakhi satar hakhmat ki Pulit Assam.
Haba ïohsngew ïa kine ki jingud jingnam jong kine ki nongïalam shnong ka shnong Mawlashna bad Madan Umwang, u President ka UHM u Bah Charlie u la kyntu ïa u Dy.SP ka Ribhoi District u GN Joshi ba ka tnat Pulit kam dei ban ailad ïa ki Pulit ka Jylla Assam ba kin pynthut ïa ki nongshong shnong khamtam ha kaba ki don ka hok ha baroh ki liang.
“U Dy. SP u la kular hakhmat ka seng ba un ym ailad satia ïa kum kine ki rukom pynthud ban pynjynjar ïa ki nongshong shnong bad u lah bthah ruh ïa u Officer-Incharge jong ka Outpost u Bah Phawa ban shimkhia halor kane ka bynta,” ong u Bah Rani.
“Hynrei watla katta ruh na ka liang ka seng kam ym shong klikti hynrei kan ïai buddien ïa kane bad kan ïai pynbor ïa ki Pulit ka Ribhoi District ba kin hap trei shitom ban ai jingïada ïa ki paid Khasi,” u la ong.
Ka UHM ka la dawa ïa ka Sorkar Jylla ba ka dei ban shim ïa ka lyngkor ban pyllait noh mardor ïa ki lai ngut ki samla Khasi 24 kynta naduh ba pynmih ïa kane ka khubor lym kumta ka Seng kan sa shim da ki sienjam ba kham tyngeh ban pynbor ïa ka Sorkar ban wanrah ïa kine ki khun samla ka ri khlem ki jing buh kyndon na ka Sorkar Assam.