Khlem buddien ki ar seng ïa ka dor katkum ka kilomitar, mih ka jingklumar ka bai kit : N. Sutnga

Jowai, Naiwieng, 07: U Bah Nangaibormi Sutnga kum uwei na ki trai trok ula mih shakhmat ruh ban ai jingkyrshan ïa ka jingïakhih kaba la lam khmat da ka Meghalaya Commercial Truck Owner and Drivers Association (MCTODA) kaba la dawa ïa ka dor jong ka bai kit ki nongñiah bad ki trai trok ka jylla na ki kharkhana dewbilat.
Ha ka jingbuddien ula lap pynban ba ka daw baroh ka dei na ka jingbakla bad jingtlot ki ar tylli ki Association trok kiba don hapoh ka Ka Joint Acton Committee (JAC), kaba kynthup ïa ka Jaiñtia Hills Truck Owners Association (JHTOA) bad ka East Jaiñtia Hills Truck Owner & Transporter Association (EJHTOTA).
U ong kitei ki Association ar tylli na Jaiñtia ki khlem ïaid katkum ka jingïakut bad ki company ban siew ïa ka dor sorkar na ka liang ka company ka la dep mynjur hynrei ki nongïalam jong ki ar tylli ki Association pat, um tip na kaei ka daw ki khlem buddien ïa ka dor katkum ka Kilometre hynrei ki pdiang thumur ïa ka dor bai kit khlem da thew ne ïaid lyngba ka dor katkum ka Kilometre.
Da kaba u ong na ka liang ka sorkar ka la dep pyntikna ba ki company ki la siew ïa ka dor bai kit katkum ka rate jong ka Sorkar, kumta kum u trai trok ula buddien ïa kane ka jingkam ka sorkar.
Kumta halor kane u ong ba ki company ha ryngkat ki Association ki dei ban jurip shwa ïa ki kilometres kumba ka dei ban long kata naduh ki jaka thep haduh ki jaka pynhap bad ki company ki dei ban siew thik katkum ka Kilometre khnang ba ki trai trok kin im bad ïohnong.
Shuh shuh ha ka jingbuddien jong ula lap ba ka jingleit jurip ïa ki kilometres, la let tang da uwei ar ngut, kata ruh tang ïa iwei ar tylli ki cement plan, khlem da jurip ïa baroh ki cement factory. Sa kawei ka jinglap dien ka long, ba kita kiba dei ban jurip ïa ka kilometres, watla ki lah dep ïoh jingkheiñ ïa ka jingjngai ne kilometres, hynrei ki khlem pynbor pat ïa kato ka company ban siew bai kit katkum ka Kilometre ba ki lahdep jurip. Kane ka pynsuba jur ïangi kum ki trai trok
‘Nga nud ban pyntikna ba lada ki company ki siew dor kumba la ïa kut ha ka dor 7 tyngka ha ka shi kilometres, ki trai trok kin nym duhnong hynrei kumba ka long mynta la siew bai kit khlem da thew ïa ka kilometres’.
Kane ka jingong u ma Sutnga kam mut ba u theh umpjah ïa ka jingïakhih ka MCTODA. Hoiid lada ïoh ïa ka dor kumba la dawa ka MCTODA lei ka dang bha shuh shuh. Hynrei kaba u sngewphylla ka long ba watla na ka liang ka sorkar ka la ong ba ki company ki la siew bai kit katkum ka dor ba la buh daka sorkar, hynrei na ka liang ki trai trok pat haduh mynta kim pat ïoh ïa ka dor kumba la ïakut daka sorkar ha ryngkat ki Association bad ki company
Jin lada dei ba ki paidbah ki ïoh dor katkum ba la ïakut kata ha ka dor 7 tyngka, ki trai trok kin nym duh nong than.
Sa kawei ka jingdawa ka long ba ki company ki dei ban pynïoh trip ïa ki trai trok thik kumba la ïa kut bad ki Association. Kumba ka long mynta ki company ki la kular ban pynïoh trip haduh 40 tylli kawei ka Association ha ka shi sngi, hynrei kaba phylla ka long ba ki trai trok ki ïoh trip tang 5 tylli ha ka shi sngi.
Ka jingdawa jong u ka long ba ki company ki dei ban pynïoh trip ïa ki trai trok thik kumba la ïa kut bad ha kajuh ka por kim dei ban khñiot na ki trai trok ïa ki byrni kiba la jot ne pei kiba long na ka daw ka jingleh khlemakor ki nongthep bad nong pynhap. Hooid lada ka dei ka jingjhieh ki byrni, ïa kata na ka liang ki trai trok kim lah ban ong eiwi ruh. Hynrei lada dei na ka jingbakla ki nongthep bad nong pynhap ki company, ka jingbahkhlieh ka dei na ki company.