Shillong, Naitung, 05: Ki paidriewngeit jong ka Balang Catholic ka Tura Diocese ki la ïam briew namar ka jingkhladnoh jong u Bishop George Mamalassery ha ka 5 tarik, Naitung, 2024 ha ka rta kaba 92 snem ha Holy Cross Hospital, Tura.
U Bishop George Mamalassery uba la shongthait na ka kam kum u nongsharai mynsiem jong ka Balang Catholic ka Tura Diocese u la ai ïa ka jingshakri na ka bynta 28 snem kynthih, kata naduh u snem 1979 haduh u snem 2007.
Tang shu ïoh ïa kane ka khubor ba sngewsih, u Myntri Rangbah ka Jylla u la pynpaw ïa ka jingsngewsih bad leit jngoh ruh ïa ka met ba dang sah ha ingmane ha Tura.
Ïa u Bishop George Mamalassery la kha ha Kerala ha u snem 1932 bad u la duhnoh ïa la ki jong ki kmie ki kpa ha ka rta kaba dang khynnah. Wat hapdeng ki jingshah tynjuh kiba bun, u la sngap ïa ka jingkhot jong u Blei ban shakri ha ka Bri Sohwain u Trai da kaba leit pule ha Seminary tad haduh ba un da shah pynkyntang Lyngdoh ha ka 24 tarik, Ïaiong, 1960.
Kum u Lyngdoh Sohblei u la shakri ha kiba bun ki bynta jong ka rilum Garo jong ka Jylla Meghalaya bad u la trei shitom ruh ban kyntiew ïa ka jingim jong ki paidbah da kaba ai jingkyrshan, ai jaka sah ha ki khep ba ki la mad ïa ki jingshah tynjuh.
U la shah thung kum u Bishop banyngkong eh jong ka Tura ha u snem 1979, ha ka rta kaba 46 snem. U la shakri ruh kum u Assistant Parish Priest ha Tura bad ha Baghmara la jan shiphew snem shwa ba un shah thung kum u Parish Priest jong ka Dalu ha u snem 1970.
Haba la khie ka thma Bangladesh bad ka Pakistan ha u snem 1971, kum u nongsharai mynsiem u la plie ïa ka jingkhang ban ai jaka sah, aibam bad ai jingkyrshan ïa ki briew kiba la kylla phetwir ha ka Parish kaba u trei.
Ha ka 8 tarik, Rymphang, 1979, ka Khet Bakhuid jong ka Vatican ka la jied bad thung ïa u Father George Mamalassery kum u Bishop banyngkong eh jong ka Tura, bad la pynkyntang Bishop ïa u ha ka 18 tarik, Lber, 1979.
Kum u Khliehduh jong ka Tura Diocese, u la lah ban plie haduh 14 tylli ki Centre bad 23 tylli ki Parish ba thymmai, pyndep pura ban shna ïa ki iingmane, ki jaka treikam, ki Convent, ki Dispensary, ki Hostel bad ki skul.
U la khot sngewbha ïa ki Phadar na ka Jingïasyllok Salesian bad na ka jingïasyllok Jesuit ban plie ïa ki College ha Tura bad ha Williamnagar.
U Bishop Mamalassery u la ai jingbit ban tei ruh 34 tylli ki Dispensary ha ki san tylli ki district jong ka rilum Garo bad u la plie ruh ïa ka Holy Cross Hospital ha Tura kaba 150 jingthiah ha u snem 1993. U la tei ruh ïa ka Rino Simonetti School of Nursing ha Tura bad khot sngewbha ïa ki Montfort Brother ban seng ïa ka Montfort Centre for the Physically Challenged. U la long uba don bynta ban sdang ïa ka Bakdil, kaba dei ka Diocesan Social Service Center.
Ka Sorkar Meghalaya ka la pynkup burom ïa u da ka khusnam Pa Togan Sankgma Award bad u la ïoh pdiang ruh ïa ka honorary doctorate ha u snem 2019 na ka University of Science and Technology, Meghalaya namar ka jingnoh synniang jong u sha u sup u thiar jong ka pule ka puthi, ka koit ka khiah bad ka jingkyntiew ïa ka ïoh ka kot.
