Khladnoh u Bah JD Rymbai, u Myntri Rangbah barim ka Jylla Meghalaya

Shillong, ïaïong, 21: U Bah J. Dringwell Rymbai uba la long teng u Myntri Rangbah barim jong ka Jylla Meghalaya u la khladnoh na kane ka sla pyrthei ha ka 21 tarik mynta u bnai ha ingsah jong u ha Mawlai Nongpathaw, Shillong ha ka rta kaba la 88 snem.
Ïa u Bah JD Rymbai, uba dei u Lamphang barim jong ka Ingdorbar Thawaiñ ka Jylla, la kha ha ka 26 tarik u bnai Risaw, 1934 na ka longïing kaba duk. U la hap ban iehnoh shiteng por ïa ka jingpule mynba u dang pule ïa ka Graduation. Ha ka jingïaid lynti jong u, u la sdang nyngkong eh ïa ka kam kum u nonghikai skul ha kawei ka skul Sorkar. Hadien ba u la pyndep ïa ka jingpule Graduate bad ïa ka Bachelor of education u la shah thung kum u Headmaster hapoh ka skul.
Hadien ka jingiehnoh ïa ka kam hikai skul, u la rung pat sa sha ka jylli jong ka saiñ pyrthei ha u snem 1983 bad u la ïakhun ïa ka elekshon sha ka Iingdorbar Thawain na ka tiket jong ka Seng Congress na Jirang Constituency ha kaba u la ïoh kheit ïa u soh ka jingjop. Ha une ujuh u hi u snem ba u la jop nyngong eh u la shah thung kum u Symbud Lamphang jong ka Iingdorbar Thawaiñ. Nalorkata, u la jop ïa ka Elekshon haduh lai samoi kynthih na Jirang Constituency kata ha u snem 1993, 1998 bad 2003. Ha u snem 1993, u la shah jied kum u Lamphang jong ka Iingdorbar Thawaiñ. Naduh u snem 1998, u la peit bun tylli ki tnat treikam kum u Myntri hapoh ka sorkar Jylla.
Naduh u snem 2003 haduh u snem 2006 u Bah Rymbai u la long u paralok uba ïajan tam eh jong u Bah D. D. Lapang bad hadien ka jingshah pynhiar shuki jong u Bah Lapang ha u snem 2006, u Bah Rymbai u la shimti bujli kum u Myntri Rangbah jong ka jylla Meghalaya ha ka 15 tarik u bnai Jylliew, 2006 haduh u nai Lber, 2007.
U Bah Rymbai u la shongthait noh na ka jylli jong ka saiñpyrthei ha ka 4 tarik, Kyllalyngkot, 2008.
Ïa ka met ba dang sah jong u, yn sa tep donburom ha ka sngi saitjaiñ ka 23 tarik u bnai ïaiong, 2022. U la iehnoh shadien i Kurim i Kong Peggymon Pathaw bad don san ngut ki khun, arngut ki shynrnag bad lai ngut ki kynthei.
Ka Sorkar Jylla lyngba u Principal Secretary ka Sorkar Jylla u Dr. Shakil P. Ahammed, u la pyntip ba ka Sorkar Jylla ka la pynbna naduh ka 21 tarik haduh ka 23 tarik kum ka sngi ïam briew ha ka jylla baroh kawei kum ka dak ka jingburom ïa ka met ba dang sah jong u Bah JD Rymbai.
Ha kine ki lai sngi, yn ym pynlong ïa kino kino ki tamasa bad ïa ka lama lairong jong ka ri yn pynher tang shiteng ha baroh ki ophis treikam jong ka jylla baroh kawei.