Nongpoh, Naiwieng 19: Uwei u Dribar u la duh noh ïa la ka jingim bad 2 ngut pat ki la mynsaw jur, kaba dei hadien kawei na ka jingjia ïa tyngkhuh kali kaba la jia mynta ka sngi ha 12mer, Byrnihat ba hap ha ka surokbah National Highway-6 ba ka Kali Maruti Alto ka la tyngkhuh bad ka Kali Toyota.
Kane ka jingjia ba sngewsih ka la jia mynta ka step ha ka por 10.30 baje ha kaba ka Maruti Alto kaba don ïa u number ML-10-A-7049 ka la ïa tynrah bad ka Kali Toyota kaba don ïa u number ML-10-S-0011 ba la niah da u Manish Kumar Jha uba la don 39 snem ka rta.
Kumba la ioh lum jingtip, kane ka Maruti Alto ka dei kaba mih na Byrnhat da ka jingthmu ban leit sha Umgtyrnga bad katei ka Kali Toyota Innova ka dang thmu ban kiew sha Byrnihat bad dei hadien ba la poi ha 12mer Byrnihat ba na ka daw ka jingniah sted katei ka Maruti Alto ka la rynsied syndon sha shiliang surok bad leit tynrah ïa ka Kali Toyota Innova kaba dang wan na ka liang pyrshah haduh ba baroh ar tylli ki Kali ki la julor.
La ïathuh ruh ba ha katei ka Maruti Alto la shong tang da u Bah Helin Lyngdoh marwei bad katba ha katei ka Toyota Innova la shong da 3 ngut kynthup ïa u Dribar bad 2 ngut ki nongshong kibala mynsaw jur bad ba la pynkit noh mar mar sha ka jaka ai jingsumar ha Guwahati.
Shuh shuh, halor kane ka jingjia, ki Pulit ka Byrnihat Police Outpost tang mar ïa tip halor kane ka jingjia ki la poi mardor sha katei ka jaka bad kiba la pynkit noh ruh mardor ïa u Bah Helin Lyngdoh sha Byrnihat PHC bad sngewsih noh hadien ba la poi ha ka jaka ai jingsumar ki Doctor ki la pyntip ba une u rangbah u la khlad noh na ka jingjur ka jingmynsaw.
