Nongpoh, Nailur 13: Uwei u briew u la duh noh ïa la ka jingim bad uwei pat u la mynsaw, kaba dei hadien ba ka Thuk Thuk kaba ki shong ka la shah tynrah ka Trok ki Gas, kaba la jia mynta ka sngi ha ka por 4 baje ei ei janmiet ha Byrnihat.
Kane ka jingkhlad noh uwei na u nongshong ka Thuk thuk bad uwei pat u la mynsaw, ka dei hadien ba katei ka Thuk Thuk ka la shah tynrah ha katei ka Trok Kit Gas kaba la ioh ban ïuh ïa uwei bad uwei pat u la mynsaw jur.
Katei ka Trok ka dei kaba don ïa u number NL-01-AA-9592 bad ka Thuk Thuk pat ka don ïa u number ML 05 H 6209, ha kaba ïa ka kyrteng utei u ba ïap bad ba mynsaw ym pat ioh satia, ba ki Pulit ki dang pynlong ïa ka jingtohkit bad ban rah ruh sha PHC Byrnhihat na ka bynta ban ioh ïa ka jingsumar ïa uba la mynsaw.
Kumba la ioh lum jingitip la ong ba kitei ki ar ngut kiba wan na ka Thuk Thuk ki dang don ha ka lynti na Umling sha Guwahati, hynrei hadien ba la poi ha Byrnihat ki la kynduh ïa katei ka jingjia ba sngewsih ba uwei u la duh ïa la ka jingim bad uwei pat u la mynsaw jur.
Shuh shuh, tad haduh ba la thoh ïa kane ka khubor ym pat ioh ïa ka jingtip kaba bniah halor kane ka jingjia bad kumjuh ruh ka kyrteng kitei ki ar ngut bad na ka liang ki Pulit ka Ri Bhoi ki dang pynlong ïa ka jingtohkit kaba bniah halor kane ka jingjia ban leh katkum ki lynti ka aiñ.
