Nongpoh, Naiwieng 10: Kum u shipai ba shlur ka ri, u Aibok Madur na ka shnong Mawbri ha Ri Bhoi District jong ka jylla Meghalaya, u la duh noh ïa la ka jingim katba u dang ai ka jingshakri ban ïada ïa la ka ri ha Siachen Glacier ha ki bynta jong ka Jammu and Kashmir.
U Aibok Madur u dei uba ai ka jingshakri kum u shipai jong ka GOC, Fire and Fury Corps jong ka Indian Army na ka Assam Regiment bad kum u shipai ba shlur u la aiti ïa la ka jingim ha kaba ïa khun pyrshah ïa ki nongshun ha ka 7 tarik u Naiwieng 2024 ha Siachen Glacier, Jammu and Kashnmir.
Na ka liang ki heh shipai (Senior Army) ki la phah ïa ka khubor sngewlem halor ka jingkhlad noh une u shipai bad ruh ka khubor sngewlem sha ka ïing ka sem jong u, kiba la duh noh ïa u na ka jingati ïa la ka jingim ha kaba ïada ïa la ka ri na ki nongshun.
Halor ka jingkhlad noh une u Shipai na ka jylla Meghalaya, ki bor pynïaid ki shipai na ka Assam Regiment, ki la wan rah noh ïa ka met jong u ha ka 9 tarik u Naiwieng 2024 ha ka ingkmie jong u ha ha ka shnoing Mawbri, bad ha katei ka sngi la pynlong ruh ïa ka jingleh burom naduh ki heh shipai bad ruh kiba haïing ha sem ha katei ka shnong ba la pun la kha ia u ha ka shnong Mawbri.
Hadien ka ka jingleh burom ïa ka met ba dang sah jong u, la buh shimiet ïa ka met jong u ha ka ïing jong ka kmie ha ka shnong Mawbri bad mynta ka sngi u Blei ki Shipai ki la rah biang ïa ka met ban leit buh sha ka shnong Lyngkhoi, kaba dei ka ïing ki khun ki kti jong u, na ka bynta ban leh burom khatduh ha ka sngi Nyngkong ha ka Shnong Lyngkhoi ba hap ha East Khasi Hills.
