Khlad u samla 19 snem ba shah tynrah ha ka trok kit dewïong be-aiñ ha surok Boko-Hahim

Shillong, Rymphang 08: Ka jingjia aksiden ha ka por mynmiet ha ka surok kaba kongsan jong ka Boko-Hahim road kaba ïasoh ïa ka Assam bad Meghalaya ka wanrah ka jingduh jong kawei ka mynsiem jong uwei u samla ba dang 19 snem ka rta ha kaba na kane ka la mih ka jingshah kynnoh ïa ki pulit kiba ym lah ban tehlakam ïa ka jingïaid jong ki triok kiba kit palat pud na kane ka thaiñ.
Kane ka jingjia aksiden kaba shyrkhei ka la jia ha ka por kumba 11:30 mynmiet ha ka sngi saitjaiñ ka 7 tarik mynta u bnai, ha kawei ka thuk thuk kaba don u nombar AS-01-MA-8365 ka la kynduh ïa ka jingjia aksiden. Utei u samla uba la khlad ha kane ka jingjia la ithuh kyrteng da u Tridip Rabha, uba sah ha Numbar ba 2 jong ka shnong Nalapara kaba hajan ka shnong Hahim.
Katkum ka jingïathuh jong u Police Outpost incharge ka Hahim Police Outpost u Bijoy Goswami, u la ong ba ka jingtip kaba bniah halor kane ka jingjia ym pat lah ban ai bad kam pat long kaba shai. Hynrei na ka liang ki nongshong shnong ki la suba jur ba kane ka thuk thuk ka la shah tynrah ha kawei ka trok kaba la kit palat pud kaba la kynnoh ba ka la rung beaiñ sha Assam na Meghalaya ha katei ka por.
Halor kane ka jingjia, ki nongshong shnong da ka jingïarap jong ki pulit, ki la pynkit noh ïa utei u samla ba la mynsaw jur sha Boko Primary Health Centre, ha kaba ki doctor ki la pynbna ba la wanrah hadien ba u la dep khlad lypa. Ha ka sngi U Blei pat na ka liang ki pulit ki la phah rah noh ïa ka metïap sha Gauhati Medical College Hospital (GMCH) na ka bynta ban pyndep ïa ka post-mortem examination.
Ka tyllong khubor na ki pulit la ïathuh ba u Tridip Rabha u la wanphai sha la ïing hadien ba u la dep ban shim bynta ha ki session jong ka Rabha National Council bad ka Rabha National Women’s Council kaba la long ha Lalmatia.
Kane ka jingjia ka la pynkhih win ïa ki nongshong shnong kiba la kynnoh ba ka surok Boko-Hahim ka la kiew ka jingbym shong shngaiñ na ka daw jong ka jingïaid ba manla ka por jong ki trok kit dewïong na Meghalaya. Ki nongshong shnong ki la kam ruh ba kine ki trok kiba ïaid manla ka por ki la pynkheiñ ruh ïa ki kyndon jong ka tnat transport, kaba la lam sha kane ka jingïaijia ki accident bad ki jingjulor ki jingtei jong ki paidbah.
Ki nongshong shnong ki la pynpaw ruh ïa ka jingjia kaba dangshen ha kawei ka trok kit dewïong ka la kylla hapoh ka ïew Hahim, ha kaba ka la pynjulor ïa ki electric pole bad lam ruh sha ka jingduh ka bording kaba la ktah ïa ka jingim ki nongshong shnong.
Shuh shuh ki nongshong shnong ki la kynnoh ïa ka jingleh bym suitñiew jong ki pulit ïa ki jingkyrpad ba manla ka por ban pyrkhing ïa ka jingïaid ki trok kit dewïong beaiñ ba kit palat pud khamtam ha ki por ba don ki prokram kiba heh ne ki jingïalang paidbah. Ki la kynnoh ba ka jingïaibteng ka jingïapher jong ki bor pynïaid ka la shah ïa ki trok kit dewïong beaiñ ban ïaid khlem shah tehlakam ne pyrkhing, ha kaba kane ka la wanrah ka jingma ïa ki jingim bad wanrah ka jingeh ïa ki paidbah na ka por sha ka por.