Nongpoh, Lber 11: Ha kawei ka jingjia aksiden shyrkhei, uwei u rangbah u la duh noh syndon ïala ka jingim mynta ka sngi hadien ba u la shah iuh ha kawei ka trok kaba dang kiew sha nongbah Shillong haduh ba ka bynta jong ka khlieh ka la pra.
Katkum ka jingtip bala ïoh lum la ong ba kane ka jingjia ka la jia ha ka por 12:30 eiei mynta ka nohphai sngi ha 20 mer Pahammawleiñ ha Ri-Bhoi Distruict ha kaba utei u rangbah u dang kiew na Guwahati da kawei ka thuk thuk kaba don ïa u number AS 04 Y 0825, hynrei shuwa ban poi ka toll gate kaba don ha 20 mer Pahammawleiñ, utei u rangbah u la shah iuh noh ha ka trok 16 sha ka kaba don ïa u number AS 01 SC 5581 kaba dang kiew lang na ka juh ka lain haduh ba un da khlad noh syndon na kane ka sla pyrthei.
Ki pulit ka Byrnihat Police Outpost tang hadien ka jingïoh jingtip ki la leit mar mar sha katei ka jaka ban pynlong ka jingtohkit bad ban rah noh ïa ka met jong utei u rangbah, na katei ka jaka.
Ha kawei pat ka jingjia, ba la jia ha Umroi Umdohbyrthih, uwei u dribar ka Local Taxi u la khlad hashen, hadien ba la leit ban tynrah ïa kawei ka Trok kaba la jia mynta ka sngi ha ka por 1 baje ei ei mynsngi.
Ka tyllong khubor ba la ïoh lum, la ong ba u Dirbar ka local Taxi ba la tip kyrteng kum u Twalson Kharbudnah na ka shnong Umsmu, Umsning kaba don ïa u number ML 06 – 8101, ka la leit tynrah hi na ki bynta ba shakhmat jong ka trok ba don ïa u number ML 04 D – 0386 ba la ñiah da u Wad Hinge na ka shnong Nongbah, West Jaintia Hills bad ha kane ka jingjia utei u dirbar ka Local Taxi u la khlad syndon hashen na ka jingjur ka jingmynsaw.
Kumba la ïathuh da ki pulit, la ong ba kane ka jingjia ka lajia, ka dei na ka jingpynher sted palat katei ka Local Taxi, kaba um lah shuh ban tehlakam bad u la leit ban tynrah ïa katei ka Trok.
Ki pulit ki dang pynlong ïa ka jingtohkit halor kane ka jingjia bad ruh ki la rah noh ïa ka met sha Civil Hospital Nongpoh ban pyndep ïa ka postmortem.
