Nongpoh, Ïaiong 22: Hadien ka jingmynsaw bad ka jingshitom kaba la jur, u nongñiah kawei ka trok kit dewbilat kaba la kylla ha khlaw Umling u la khlad noh na kane ka sla pyrthei ha lynti ban rah sha jaka sumar sha Guwahati.
Katkum ka khubor ba la ïoh lum na ki pulit, la ïathuh ba utei u nongñiah u dei u ba la tip kyrteng kum u Sanjay Rai 38 snem ka rta na ka jylla Bihar bad ïa ka met jong u la rah bad buh ha jaka buh metïap ha Nongpoh Civil Hospital.
Kum ban shu pynpaw ba katei ka jingjia aksiden ka la jia hynnin ka janmiet haka por 6 duna eiei ha kaba kawei ka trok kit dew bilat kaba don ïa u number UP 65 CT 6280 ba la ñiah da u Sanjay Rai ka la kylla bad hap sha nala haduh ba kan da pra phum, ha kawei na ki jaka ba kham khongdong haki bynta jong ka khlaw Umling kaba dei ruh na ka jingpheil brake katei ka trok kat haduh ba u nongñiah um lah shuh ban tehlakam ïa ka kali kaba don ruh da ki spah byrni ka dewbilat.
Na ka liang ki bor pulit, ryngkat ka kynhun jong ka NHAI, Fire and Emergency Service lem bad ka kynhun Search and Rescue Team ki la pyrshang ban sei ïa utei u rangbah hynrei ka shim bun haduh bun kynta ban ïoh sei namar ka jingsahkut shapoh ba la pyndonkam ruh wat ki kor puh shillum, hynrei katduh khatwai hadien bun kynta ki pulit ki la ïoh ban sei noh ïa u bad pynkit mar mar sha Nongpoh Civil Hospital ban ïoh ka jingsumar ba kyrkieh.
Namar ka jingshitom bad ka jingmynsaw kaba la kham jur na ka liang ki doctor ki la phah rah noh sha ki jaka sumar ba kham shalor ha kaba la pynkit noh ïa u sha Guwahati ban ïoh ka jingsumar ba kham paka hynrei namar ka jingmynsaw jur u tei u nongñiah u la khlad noh shiteng lynti shuwa ban poi sha Hospital bad ïa ka met jong u tei u nongñiah la pynkit noh sha jaka buh metiap ha Nongpoh Civil Hospital na ka bynta ban pyndep ïa ki jingdonkam baroh katkum ki kyndon jong ka aiñ.
