Nongpoh, Naiwieng 08: Ha kawei na ka jingjia kylla kali, uwei u nongñiah jong ka trok u la khlad noh hashen hadien ba ka trok ka la kylla khongpong ha Umsning By-pass kaba hap ha Ri Bhoi District namar ka jingpynher sted shaba u nongñiah kat haduh ba ka trok kaba don ïa u number AS-01-RC-0613 ka la tynrah shwa ïa ka jingker bad ryngkang sha kawei pat ka bynta ka surok.
Kane ka trok ka dei kaba wan kit ïa ki ñiut bad ki jaboh jabaiñ na Guwahati, Assam da ka jingthmu ban leit theh sha rilum Jaiñtia bad hadien ba la poi ha ka surok Umsning By-pass ka trok ka la kylla khongpong bad ka la ban ïa u nongñiah uba la kylla la tip kyrteng kum u Dawni Dkhar uba sah ha ka shnong Madur, East Jaiñtia Hills haduh ba un da khladnoh hashen.
Ha kane ka jingjia, u nongbud jong ka trok uba la mynsaw u dei uba la tip kyrteng kum u Ericson Swer na ka shnong Ummulong, West Jaiñtia Hills.
Katkum ka jingtip ba la ïoh lum, la ïathuh ba kane ka la jia ha ka por 2:00 baje noh sngi.
La ïathuh ruh ba ïa u nongñiah uba la khlad la rah noh sha Civil Hospital Nongpoh ban pyndep ïa ka postmortem examination bad ïa u nongbud ba la mynsaw la rah sha CHC Umsning ban ïoh ïa ka jingsumar.
Ki Pulit jong ka Umsning Police Station tang ïoh jingtip ki la leit mardor sha katei ka jaka ban ïarap sei ïa ka met jong u nongñiah ba la sahkut na ka jingshah ban ha ka trok ba la kylla khongpong bad ki Pulit ruh ki dang pynlong ïa ka jingtohkit.
