Mawkyrwat, Naiwieng, 30: Uwei u khynnah uba dang don hapdeng ka rta 12 snem bad 13 snem u la khlad hashen hadien ba ka bos ka la ïuh ïa u ha ka shnong Lower Puksora, South West Khasi Hills District.
U kyrwoh ba la phah da u Superintendent of Police ka South West Khasi Hills District Bah B. Jyrwa u la ïathuh ba ha ka 29 tarik, Naiwieng, 2025 ha ka por kumba 11:48 baje mynstep la ïoh jingtip lyngba ka telephon ba ka don ka jingjia aksiden ha Lower Puksora bad uwei u khynnah uba la tip kyrteng kum u Eveningstar P Marak uba dang don hapdeng ha ka rta 12-13 snem u la hap na ka bos bad ka bos ka la ïuh ïa u.
Ha kane ka jingjia une u khynnah ba u la khladnoh ha shen.
La ïathuh ba ki nongtrei na Gumaghat CP ki la leit marmar sha katei ka jaka ban pynlong ïa ka jingtohkit.
Ha ka jingtohkit la ïathuh ba u khynnah uba la khlad u la ïeng ha ka foot board jong ka Bus bad u la bat ïa u Bus Handle shi liang kti.
Ki Pulit ki la kurup noh ia ka Bos bad rah ia u nongñiah sha thanat ban pynlong shuh shuh ïa ka jingtohkit.
ïa ka case la register mukotduma ha Ranikor Police Station.
