Khlad u Dy.CM bad ki 4 ngut ba hap ka liengsuiñ ha Pune

Pune, K’lyngkot 28 : U Symbud Myntri Rangbah ka Maharashtra, u Ajit Pawar ryngkat bad sawngut kiwei pat ki la duhei ïa la ka jingim hadien ba ka liengsuin ba ki shong ka la hap ha Pune district hynne ka step sngi Balang hajan Baramati ha Pune district.
Katkum ka Flight Radar, katei ka liengsuiñ ka mih na Mumbai ha ka por 8.10 am bad jahrngai na ka radar ha ka por 8.45 am bad hadien katto katne por pat ka la hap bad bthei noh.
Ki khubor ki la kam ba katei ka liengsuiñ ka shem jingeh ban hiar khyndew namar ka jingtap lyoh bad dei kane kaba pynlong ïa ka ba kan hap syndon bad bthei.
U Pawar u dang thmu ban leit sha Baramati na Mumbai ban ai jingïakren ha ka jingïalang paidbah na ka bynta ka ilekshon zilla parishad ka ban long ha ka 5 tarik u bnai ban wan.
Kum ban shu pynkynmaw, u Ajit Pawar u la bat haduh sawsien ïa ka shuki Symbud myntri rangbah (Deputy Chief Minister) ka Maharashtra hapoh ka jinglong myntri rangbah u Prithviraj Chavan, Uddhav Thackeray, Eknath Shinde bad Devendra Fadnavis.
Na ka liang u Myntri Rangbahduh ka ri, u Narendra Modi u la pynpaw ka jingkyndit halor kane ka jingkhlad kyndit u Pawar bad phah ruh ka jingsngewlem sha kiba haïing hasem.
“U Ajit Pawar u dei u nongïalam ba khraw uba don ka jingïadei kaba ïajan bha bad ki paidbah. U dei u briew uba sngewrit bad uba trei shitom ban shakri ïa ki nong Maharashtra. U dei u nongïalam ban kyntiew kyrdan ïa ki briew kiba duk bad kiba mad bun ki jingeh. Ka jingkhlad khlem poi pyrkhat ka pynsngewsih kthang ïa ngi baroh. Nga phah ka jingsngewlem sha kiba haïing hasem jong u bad sha ki paidbah ka Marashtra. Om Shanti,” ong u Modi ha u kyrwoh lyngba ka X.
Kiwei pat kiba phah ka jingsngewlem ki kynthup ïa u Myntri Kampohïing ka Ri, u Amit Shah nalor kiwei kiwei.