Khlad sa uwei u heprit, leit jngoh ki ophisar ka Meghalaya ïa ki khynnah ba kem pang ha Karnataka

Shillong, Lber, 18: Arngut ki ophisar na ka jylla Meghalaya ki la hiar sha ka jylla Karnataka ban ai jingïarap ïa ki khynnah kiba dang don mynta hapdeng ka jingshah sumar ha hospital hadien ba ki la kem pang na ka jingbam ïa ka bam ba long bih kat haduh ba arngut na ki khynnah ki la duhei ïa la ka jong ka jingim.
U Commissioner and Secretary jong ka tnat Kam Pohing ka Sorkar Jylla Bah Cyril Diengdoh bad u Deputy Commisioner jong ka Mandya District, u Mandya Kumar ki la leit ban ïakynduh ruh ïa ki khynnah kiba dang don hapoh hospital ban peit ïa ka jinglong jingman ka jong ki bad ban ai jingkyrshan ruh ïa ki katba ki donkam.
Arngut ki ophisar ba la thung da ka tnat Pule Puthi ban pynlong ïa ka jingtohkit ba kynthup ïa u Sub-Inspector of Schools Bah P. Sunn u District MIS Bah R. Kharsyntiew ki la hiar sha Karnataka ban pynlong ïa ka jingtohkit kaba bniah bad ban ïatreilang bad ki kmie ki kpa jong ki khynnah na Meghalaya bad ban phah ïa ka kaiphod kaba bniah sha ka Sorkar.
“Ki Pulit ki la kem ïa ki briew ba donkti ha kane ka kam bad ngin sa pyrshan ban wan ïalam noh ïa kine ki khynnah sha la ing,” ong u Myntri Rangbah ka Jylla Conrad K. Sangma ha ka sngi Baar.
Kane ka la jia hadien ba 30 ngut ki khynnah skul, kynthup ïa ki 26 ngut na ka jylla Meghalaya ki la kem pang jur hadien ba ki la bam ïa ki jingbam basah na ka jingrakhe Holi ha kawei ka hostel bym shym la ïoh jingbit ha ka shnong T Kagepura, ka Mandya District, Karnataka. Ki khynnah skul ki la ïoh ïa ka jingpang prie, pynhiar bad tyrkhong ka met, ha kaba la pynkit noh ïa ki mar mar sha hospital.
Ha kane ka jingjia, arngut ki khynnah na ka jylla Meghalaya ki la khladnoh ba kynthup ïa u heprit Khrehlang Khongtani, 13 snem ka rta na ka shnong Lyndem, Pynursla Civil Sub-division uba dang pule ïa ka Class-VI. Uwei pat u khynnah skul uba la khladnoh ha Karnataka u dei uba la tip kyrteng kum u Namebantei Marweiñ, 12 snem ka rta uba dang pule ïa ka Class-VII u khun jong u Bah Toberlin Nongsiej bad ka Kong Shimtisful Marweiñ na ka shnong Sohparu ka shnong kaba jngai tang kumba katto katne kilomitar na sor Nongstoiñ West Khasi Hills District.
U Myntri Rangbah u la pynbna ruh ban ai jingïarap 3 lak tyngka sha ki bahaiing hasem jong kine ki arngut ki khynnah skul kiba la khladnoh bad pyntip ruh ba ka Sorkar Jylla kan bei lut nadong shadong ïa ka bailut baisep na ka bynta ka jingsumar ïa kine ki khynnah.
U Myntri Rangbah u la pynpaw ha ka rynsan X ïa ka jingsngewlem ïa ki bahaiing hasem jong kine ki arngut ki khynnah kiba la khladnoh.