Shillong, K’Lyngkot 23: Ki pulit ka Cantonment Beat House ki la ïathuh ba ha ka 21 tarik u Nailar 2025 ha ka por 3:50 janmiet ki la ïoh jingtip ba u don uwei u briew u la hab napoh ka 3 mala jong ka Municipal Parking Lot Mawlonghat, Shillong.
Halor kane ka jingjia ki pulit ka Cantonment ki la pynkit noh mardor sha Civil Hospital Shillong, da ka 108 Emergency Service na ka bynta ban phah sumar.
Kham hadien ha kane ka juh ka sngi la pynkynriah noh sha NEIGRIHMS na ka bynta ban ïoh shuh shuh ki jingsumar kiba kham biang. Katkum ka jingtohkit jong ki bor ba dei peit une u ba la mynsaw u la ïathuh ba u kyrteng u Bah Donistar Kharkongor uba ha ka rta kumba 40 snem eiei uba dei ruh u khun jong u Bah Elek Pathaw, ba shong basah ha ka liang sepngi ka shnong Mawkhar main road, Shillong, kaba long katkum ka jingpynpaw hapoh ka EPIC jong u.
Une u briew u don hapdeng ka jingshah sumar naduh ka 21.08.25 ha NEIGRHIMS bad ha ka 23.01.26 ha ka por kumba 11:50 mynmiet la ïoh jingtip na NEIGHRIMS ba une u briew u la khlad noh hapdeng ki jingshah sumar.
Ïa ka met jong u haduh mynta la buh hapoh ka kamra buh metïap jong ka NEIGHRIMS na ka bynta ki jingpynithuh bad ban wan kam da ki bahaïing hasem, ong ka kyrwoh na u SI B S Sangma, Cantonment Police Beat House, Shillong.
