Khlad noh u Principal ka Mynken Christian HSS u Babu EM Pyngrope

0

Nongpoh, Nailar, 26: U Babu E.M Pyngrope ba dei u Principal jong ka Mynken Christian Higher Secondary School, Bhoirymbong bad long ruh u Tymmen Basan jong ka Balang Presbyterian Umroi u la khlad noh na kane ka sla pyrthei bad ieh noh shadien ïa ka iing ka sem bad ki baieid bathoiñ ha ka step sngi Baar ha Apollo Hospital, Guwahati hadien ka jingshitom kaba la neh katto katne por.Ka jingkhlad noh jong u Babu EM Pynrope ka long shisha ka jingduhnong kaba khraw ïa ka skul Mynken Christian HSS baroh kawei, ka Balang Presbyterian bad wat ka imlang ka sahlang namar u dei u briew u ba ki paidbah bad ki khynnah skul ki ïeid bad burom.
Katkum ka jingïathuh i khun jong u Babu EM Pyngrope la ong ba ka jingpang ka la ban ha ka met jong I la kumba 1 bnai eiei bad I don hapdeng ka jingshah sumar ha ki doctor, hynrei ha ka sngi u Blei la pynkit noh ïa I sha Apollo Hospital na ka bynta ka jingsumar hynrei tang hadien 2 sngi u Blei u la shim noh syndon ïa I na kane ka sla pyrthei ban ieh noh shaiden ïa ki khun ki kti bad kiba ieid ba thoiñ baroh.
U Babu EM Pyngrope u dei u ba shong ba sah ha Umroi Jaiaw pdeng bad udei uwei na ki rangbah u ba la noh synñiang shibun sha ka pule puthi kum u nonghikai bad Principal, hadien ba ka skul Mynken ka dei ruh kawei na ki skul ba paw ha ka them Ri-Bhoi naduh ka pule ka puthi bad wat ki kam ïalehkai bad wat ïa ka Balang Presbyterian Umroi namar u dei ruh u rangbah u ba kitkhia ban tynrong ruh ïa ka kam shakri Blei nalor ka pule ka puthi bad ki kam ha ka imlang ka sahlang.
Dang ha u snem ba la dep, u Babu EM Pynrope u dei ruh u nonghikai na ka jylla u ba la ïohpdiang ïa ka National Teacher’s Award na ka President jong ka ri India ka Droupadi Murmu ha nongbah Delhi.
Ka jingleh burom khatduh ïa ka met ba sha jong u Babu EM Pyngrope kan long ha ka 28 trrik Nailae 2025 ha u lum jingtep ka Balang Presbyterian Umroi.

Leave A Reply

Your email address will not be published.