Shillong, Nailar 16: U Myntri Rangbah barim ka Jylla u Salseng C Marak, ula khlad noh ha ka sngi Thohdieng ha ka rta kaba 83 snem.
U Salseng C Marak, ula khlad noh hapdeng ka jingsumar ha Tura Civil Hospital. Ïa u Salseng la kha ha u snem 1941.
Lah ban pynkynmaw ba u Salseng u dei u Nongïalam ba ratbah jong ka Indian National Congress (INC) bad u dei uba mihkhmat kum u MLA jong ka Resubelpara.
U la shah thung nyngkong eh kum u Myntri Rangbah ka Jylla ha u snem 1993 ha ka jingsynshar ka Sorkar synrop ba ïalam da ka Congress. Kum u Myntri Rangbah ba hynriew ka Jylla, u dei u Myntri Rangbah ba nyngkong eh ban ïoh bat ïa u lakam ka jingsynshar kaba neh baroh san snem pura.
La ong ba u Salseng u dei uwei napdeng ki nongïalam saiñ pyrthei ba ïa burom bha ha Jylla namar ka jinglah jong u kum u nongïalam ha ka synshar khadar bad ka kam saiñ pyrthei.
U Salseng u dei ruh uba la ïoh shong shuki ba khyndiat por ruh kum u Myntri Rangbah ka Jylla kaba neh tang 12 sngi ha u snem 1998, kaba pynkheiñ ïa ka record ba bat da u Bah BB Lyngdoh jong ka Sorkar ki seng Riewlum ba neh tang 30 sngi hashuwa ba kan shah pynkhyllem ha u snem 1988.
Ha u snem 1998, u Salseng ula shah jied kum u Myntri Rangbah ka Jylla ha ka 10 tarik Lber, 1998 hynrei ula ïoh ban shong ha ka shuki tang 12 sngi namar ka jingïapait ïapra noh jong ka kynhun synrop, kaba plie lynti ïa ka Nongïalam ka United Parliamentary Forum Bah (L) B B Lyngdoh ban shimti ïa ka shuki Myntri Rangbah ka Jylla.
La ong ba u (L) Salseng C Marak u dei ruh uwei na ki riewsaiñ pyrthei uba ju kren bha pyrshah ïa ka jingïadon jingïadei hapdeng ki seng kaikhlaw bad ki riew sain pyrthei.
U Salseng C Marak u la bat teng ruh kum u President jong ka Meghalaya Pradesh Congress Committee (MPCC) ha u snem 2003.
Ha kaba iadei bad kane ka jingjia u yntri Rangbah ka Jylla Conrad K Sangma, u la pynpaw ïa ka jingsngewsih halor ka jingkhlad noh u Salseng. Ula ong, “Sngewsih kthang ban ïoh khubor ïa ka jingkhlad noh u CM barim u Salseng C Marak. Ka synniang jong u sha ka roi ka san ka Meghalaya kan dei ka ban ïa kynmaw beit. Nga phah ïa ka jingsngewlem sha ki bahaïing hasem bad ki baieid bathoiñ jong u. Ai ba un ïoh ïa ka jingjahthait ka bymjukut sha la ki kti U Kynrad”.
