Jowai, Risaw 16: U Bah H.B. Dan ba ju khot ieid ma Ten, MLA barim ka Nartiang Constituency ula khlad noh na kane ka sla pyrthei ha ka step jong ka sngi Balang ha ïingsah jong u ha Dulong, Jowai, hadien ka jingshitom kaba la neh tang katto katne bnai.
U (L) Bah H.B. Dan, u la ju long kum u MLA ka Nartiang constituency lah 3 sien kynthih ha ki snem 1978 (Minister of State) 1988 bad 1998 (Cabinet Minister) da kaba bat ruh ïa ki tnat bapher bapher jong ka sorkar Meghalaya. U la ju bat ruh kum u nongialam ka Liang Pyrshah (Leader of Opposition) jong ka Meghalaya State Assembly.
U la ju long ruh kum u MDC la 2 samoi bad u la ju bat ruh ïa ka kyrdan CEM jong ka JHADC la 3 sien. U long ruh uwei na ki riew rangbah uba ju ai buit ai bor ha ka synshar khadar bad ka saiñ hima sima.
U long u Tymmen Basan jong ka Balang Presbyterian Nongjngi. Ula ieh noh shadien ïa i kurim jong u, 7 ngut ki khun (4 shynrang bad 3 kynthei) bad ïa ki 19 ngut ki khun ksiew.
Ka jingkhlad noh jong une u rangbah ka long ka jingduh kaba khraw ïa ka ïing ka sem, ki kur ki jait, ki kha ki man, ki lok ki jor, ka Balang bad ka shnong ka thaw.
Ka sngi leit on tep ïa u kan long ha ka 18 tarik u Risaw, 2024 naduh ka por 12 baje mynsngi, na ïing ha u lum jingtep jong ka Balang Presbyterian Jowai.
Ha kawei pat ka liang u Lamphang ka Ïing Dorbar Thaw Aiñ ka jylla u Thomas A Sangma, bad ka Meghalaya Legislative Assembly Secretariat, ki la pynpaw ïa ka jingsngewlem halor ka jingkhlad noh jong u (Late) Bah H. Britainwar Dan.
U Lamphang ka Ïing Dorbar Thaw Aiñ u Thomas A Sangma, u la pynpaw ka jingsngewsih kaba khraw bad ka jingsngewlem halor ka jingkhlad noh jong une u Nongthaw Aiñ ba barim u Bah H. Britainwar Dan.
Kumba la ju khot ieid da u Ma Dan, u Bah Dan u la shah jied napoh ka Nartiang Constituency 3 sien kynthih bad u la long ruh kum u Myntri ka sorkar bad kumjuh ruh kum u Nongïalam ka Liang Pyrshah. U la shah jied ruh 2 sien kum u MDC ka Jaiñtia Hills District Council bad u la long teng u Chief Executive Member.
