Shillong, Nailur 12 : U Myntri Rangbah ba rim jongka jylla Meghalaya I Dr Donwa Dethwel Lapang ne Dr D.D Lapang kumba ïa tip lut da baroh i la khlad kyndit noh na kane ka pyrthei mynta ka miet ha Bethany Hospital ha ka por kumba 11 baje mynmiet hadien ka jingshitom kaba tang katto katne por. La kha ïa i ha ka 10 tarik Iaiong 1934 bad I la dap 91 snem ka rta . I la ïehnoh shadien ïa i kurim kong Amethyst Lynda Jones Blah, u khun bah Baluk Blah lem bad ki pyrsa bad ki ksiew.
I Dr Lapang i la jop nyngkong eh kum u MLA jongka Nongpoh ha u snem 1972 kum u kyrtong shimet (Independent). Hadien kane i la pynïasoh noh sha ka seng Congress bad i la long kum u Myntri Rangbah ka jylla haduh san sien kynthih. Nyngkong eh i la shimti ïa ka shuki Myntri Rangbah ka jylla ha u snem 1992 haduh 1993. Hadien kane i la shimti biang ha ka 4 tarik Lber 2003. I la hiar shuki kum u myntri rangbah noh ha ka 15 tarik Jylliew 2006 namar ba ka don ka jingïapher jingmut ha ka sorkar synrop lang. Hynrei i la shimti biang ïa ka shuki Myntri Rangbah ha u Lber 2007. Ha u 2008 ka Congress ka la jop bun eh ki MLA bad I la shimti biang kum u Myntri Rangbah ha ka 10 tarik Lber 2008. Hynrei namar ba don tang 28 ngut ki MLA kumta I la hiar shuki noh ha ka 19 tarik Lber. I la shimti biang ïa ka shuki Myntri Rangbah ka jylla ha ka 13 tarik Jymmang 2009 hadien ba ka jylla ka la mad ïa ka jingsynshar President ba ar bnai lynter. I la hiar noh na ka shuki Myntri Rangbah ha ka 19 tarik Iaiong 2010.
I la shongthait bad khlem ïa khun shuh ïa ka election MLA naduh u snem 2018. Hadien kane i la pynïasoh noh sha ka NPP bad long kum u Adviser ne Nongaibuit jong u Myntri Rangbah u Conrad K Sangma haduh kane ka khyllipmat.
