Nongpoh, Rymphang 13: U wei u briew bym lah ban ithuh satia u ba la lap hapdeng ka jingmynsaw jur ha surok bah NH-6 ha 12 mer pyrshah ka Bharat Petrol Pump u la khlad noh na kane ka sla pyrthei.
U Superintendent of Police ka Ri-Bhoi u la pyntip ba ha ka 29 tarik Kyllalyngkot 2025, ha ka por kumba 11:56 baje eiei la lap ïa uwei u briew bala mynsaw jur na 12 mer, bad ïa utei u briew la pynkit noh mar mar sha Sonapur Hospital Assam na ka bynta ka jingsumar bad hadien la pynkynriah noh sha GMCH Hospital, Assam bad u tei u briew u la khlad noh syndon ha katei ka jaka sumar, bad baroh ki jingdonkam katkum ki kyndon aiñ la pyndep da ki pulit jong ka Bhangagarh Police Station.
Utei u briew bym lah ban ithuh satia u phong ka sopti ba rong blue, ka patlun jeans rong blue bad ka patlun lyngkot ba rong blue, u shñiuh ba iong, ki khmat rong iong bad don ka jingjrong kumba san phut san inshi.
