Khlad noh u ba ñiah trok hadien ba ka trok ka la tyngkhuh ïa ka ïing – dukan ha Khliehriat

Khliehriat, K’Lyngkot 08: Ha ka miet jong ka 7 tarik kyllalyngkot kawei ka trok kaba don u registration number JK-O2AT-6315 ka la leit tynrah ïa kawei ka ïing kaba don lang bad ka dukan harud surok hajan ka pertol pump ba don ha Khliehriat East bad uba ñiah ïa kane ka trok uba la tip kyrteng kum u Surinder Singh (52 snem) uba na Jammu u la khlad noh.
Katei ka trok ba ñiah u (L) Surinder Singh ka la leit tynrah da ka khmat ïa ka ïing ba don bad dukan ha kaba uba ñiah u la sahkut noh ïalade hapoh ka cabin jong ka trok bad hadien ba ki pulit ki la lah sei ïa u shabar ki la pynkit noh mar mar sha civil hospital Khliehriat hynrei ki doctor ki la ong ba une uba ñiah u la dep iap lypa naduh shwa ban poi sha hospital, kumta la buh noh ïa u ha ka jaka buh met iap ha hospital Khliehriat bad ki pulit ki la pyntip sha kiba ha ïing jong u Surinder Singh halor kane kaba la jia ba kin dup wan shimti noh ïa ka met ba sah jong u.