Khliehriat, K’Lyngkot 06 : Ki ar ngut ki khynnah samla kiba la tip kyrteng kum u Tylliangki Muksor, 19 snem kyrta bad u Ericson Muksor, 20 snem kyrta ki la khlad noh hadien ba ki la ngam jyllop ha ka wah Serbi kaba don ha shnong Umrasiang East Jaiñtia Hills District bad kane ka la jia myn ha ka 4 tarik mynta u bnai kyllalyngkot.
Ki tyllong khubor ki iathuh ba halor katei ka jing jia ngam jyllop, u Waheh Shnong jong ka shnong Musiang Lamare u la pyntip sha ki pulit bad ong ba kitei ki khynnah samla ha katei ka sngi ki la leit sum sha katei ka wah Serbi ha kaba ki la kynthih nalor maw shapoh um ba long thwei kaba hajan ka kshaid bad ki la ngam jyllop khlem mih shuh napoh um.
Mar mar hi na ka liang kynhun SRT lem bad ki pulit tang shu ioh jingtip ki la leit sha katei ka jaka bad ki SRT ki la lah ban sei ïa ki met jong ki samla kiba ngam jyllop bad ki pulit ki la rah bad pyndep ruh ïa ka postmortem bad ïa ki met ba sah la aiti noh sha kiba ha ïing.
