Khlad noh ki 2 ngut shipara ki khynnah skul bad nongrwai ba pawnam ba shah btep ha ka jingtwa

Nongstoiñ, Jylliew, 17: Arngut ki shipara, i Caffinia Nongsiej, 15 snem bad i Maïanylla ba la 10 snem ka rta, ki la khlad ha shen katba ki arngut kiba shipara bad ki, i Saniti 13 snem bad i Isadaka 8 snem ki la lait im, ha ka jingtwa jong ka khyndew kaba la ban ïa ka iing jong ki ha Mawlangniang, Pyndengrei, kaba jngai 14 Km na Nongstoiñ. West Khasi Hills District.
U kpa jong ki, u Bah Alexander Lyngdoh Nonglait, uba don lang ha ka iing por ba twa ka khyndew ruh u la lait im, katba ka kmie jong ki pat, ka Kong Beautiful Nongsiej ka dang don sha shnong.
La ïathuh ba kane ka iing, kaba don ha phyllaw iing jong ki kmie kha, kaba la shah ban khyndew ka dei kaba ki dang shu dep shna bad sah mynta dang kumta artaiew.
Baroh saw ngut shipara ki dei kiba dang pule ha St. Peters Higher Secondary School, Nongstoiñ . I Caffinia i dang pule Class-X bad i Maïanylla i dang pule Class-IV. I Caffinia idei i nongrwai jong ka kynhun Kids Tarari Choir na Nongstoiñ,.
U kpa u la ïathuh ba ka jingtwa ka khyndew ka la long kynsan kynsan ha ka por ba ki dang ïoh thiah lyngngai ha ka jingjur jong u slap.
U kpa haba u la kyndit na ka jingsawa u la khie kynsan kynsan ban pyrta jingïarap . Hynrei namarba ka khyndew ka la rung sha iing da ka bor kaba sted bad khlaiñ bha ka la rat ïa ka kynroh maw blok napoh bad ïa ki lyntang na jrong.
U Kpa u la ïoh pyllait tang ïa ki arngut ki khun katba ki arngut pat ki la shah tyllep ha ka khyndew.
Hadien la wan sa ki para marjan kiba la ïoh sei shuwa ïa i Maïanylla bad hap ban pynpait ïa ka kynroh na sha shiliang ban sei ïa ka met i Caffinia. Hadien kane la rah sha Civil Hospital Nongstoiñ ban pyndep ïa ki jingdonkam baroh.
Ha ka por janmiet la pynkit noh ïa ki da ka Matuary Van jong ka NRLTODA bad ki paralok parajor ki para marjan ki la synran ryngkat ka jingïam briew.
Kaba la pynpangnud eh ïa kiba bun dei ynda la poi ha iing, haba shuwa ban sei na ka kali, la ïohsngew ba u kpa u la ïam paid dohnud da kaba ong artad, “Khei noh khon khei, lar lah ha yung”, kaba mut “khie noh khun khie lah poi ha iing”.
I para khatduh, i Ïasadaka ruh i la ïam pangnud bad baroh kiba don ha katei ka por.
La pynthiah lang ïa ki baroh arngut ha kajuh ka jingthiah kaba la ker da ki jain kiba lieh. Hangne ruh ka la don ka jingïam briew kaba da sngewmyllung haduh katta katta.
Ka kmie jong ki, kaba dei ki nonghikai skul SSA hajan shnong, la ïathuh da ki bahaiing, ba ka la shu ïap ler shiphang shiphang mar syntip ïa kane ka jingjia bad mynta ka la don ruh hapdeng ka jingbym koit bym khiah bha jong ka bormet.
Ha ka por ba la wan poi ka met jong ki khun ruh ka kmie kam shym la la lah shuh ban khie namar ka jingtlot jong ka met.
Hadien katto katne por, u Bishop jong ka Jyllaniam Nongstoiñ u Rt. Rev. Wilbert Marweiñ, DD ryngkat bad ki Sister kiba pynïaid ka St. Peter Higher Secondary School, Nongstoiñ ki wan jngoh ïa kane ka longiing bad pynlong ruh ka jingduwai kyrpang na ka bynta ka jingjahthait jong ka mynsiem jong kine ki arngut ki heprit kiba la khladnoh bad ïa ka iing ka sem baorh kawei.
Ïa ka met jong kine ki arngut shipara yn tep donburom ha ka 19 tarik mynta u bnai.