Khlad noh ka longkmie ha ka jingjia twa khyndew ha Jashiar, lait im u kpa bad ar ngut ki khun

Mawkyrwat, Jylliew 16: Kawei ka jingjia kaba sngewsih ka la wan jia ïa kawei ka longïing ha Shnong Jashiar, South West Khasi Hills District ha kaba kawei ka longkmie ka la khlad noh hadien ba ka ïing sah jong ka ka la shah rong na ka daw jong ka jingtwa kynsan ka khyndew.
Halor kane ka jingjia, katkum ka jingïathuh jong kiba ha ïing bad ki para marjan la ong ba kane ka jingjia twa khyndew ka jia ha ka por kumba 12:30 shiteng sngi jong ka 16 tarik u Jylliew, 2022 katba longkmie kaba kyrteng ka kong Hailsentinari Marweiñ, 25 snem ka dang thmu ban shet jingshet ha iwei i ïing ba ki ju pyndonkam ban shet manla ka sngi. “Kynsan kynsan nga shu ïoh sngew ba don ka jingbthei bad la ïohi ïa ka jingher ki tiar ki tar bad ki tin sop ïing na kata ka jaka”, ong kawei ka longkmie ba sah marjan.
Shwa kata ka jingjia, ka kong Hailsentinari Marweiñ kaba dei ka kmie jong ki ar ngut ki khun ka dang leit ban tong doh na wah Rilang kaba don hajan jong ka Shnong Jashiar, bad hadien katto katne por ynda ka la wan phai na kata ka jingleit ban tong ka sa jia kane ka jingtwa khyndew bad rong ïa ka briew ryngkat bad ka ïing. “Ïa ka met jong kane ka longkmie la antad ba ka la shah rong la kumba 20 meter ei ei”, ong kiba ha ïing.
Hadien kane ka jingjia, ïa ka met jong ka la pynkit noh ma mar sha CHC Mawkyrwat khnang ban ïoh ka jingsumar hynrei sniew bok ba tang katto katne minit ka la khlad noh na kane a pyrthei. Kane ka longkmie ba la khlad noh ka la ieh shadien ïa ar ngut ki khun ka Alfidari Marwein kaba dang 6 snem karta bad ka Nafi Marweiñ ba 4 snem ryngkat u kurim jong ka u bah Arjun Marthong.
Ïa ka met jong ka hadien ba ka la khlad noh la aiti noh ha kiba ha ïing ha sem ba kin pyndep ïa ka niam ka rukom.