Shillong, Nailur 22: Ka Meghalaya Football Association (MFA) ka la phah ïa ka jingsngewlem halor ka jingkhlad noh jong ka Ibaihun Kurbah hadien ka jingïakhun kaba la bun bnai pyrshah ïa ka jingshitom kaba ktah ïa u khyllai.
Ka Ibaihun, kaba dang don ha ki 20 snem tam, ka long ka nongïalehkai kaba don jingkyrmen ha ka jingïalehkai phutbol bad ka la mihkhmat ïa ka Meghalaya kum ka nongap kol, kum ha ka lympung Sub-Junior Girls National Football Championship ha u snem 2019. Ka la kyrshan ruh kum ka nongap kol jong ka Lawei SC kaba na Smit ha ka Shillong Sports Association’s Women’s League.
Ka la khur ruh ïa ka khusnam Best Athlete ha ka kyrdan ïalehkai U-18 jong ka lympung State Level Chief Minister’s Inter School Athletics Meet ha u snem 2022 bad ruh ha ka kyrdan U14 ha u snem 2017.
Hynrei ka jingshitom ka la ban noh ïa ka Iba ha kaba sdang jong une u snem. Hadien ba ka la sdang ban mad ïa ka jingtlot jong ka met ka la leh katto katne ki test bad nangta ki doktor ki la pyntip ïa ka ba ki khyllai jong ka ki la sniew.
Ka jingkhlad noh jong ka, ka long ka jingsnewsih kaba khraw ïa ki riew ïalehkai ha Meghalaya.
Kumta na ka na ka liang jong ka MFA lyngba u President jong ka u Bah Hamletson Dohling ka la phah ïa ka jingsngewlem sha kiba haïing hasem jong ka Ibaihun Kurbah.
“Ka Meghalaya Football Association ka sngewsih jur ïa ka jingkhlad noh jong ka Ibaihun Kurbah, kaba la iehnoh kloi palat ïa ngi. Ka Iba kam dei tang ka nongap kol kaba tbit kaba la mihkhmat ïa ka Meghalaya ha ka Sub-Junior Girls National Football Championship 2019, hynrei ka dei ruh ka khynnah samla kaba tyngshaiñ ha kaba ka jingieid, ka jinglong ryntih bad ka sap jong ka, ka ai mynsiem ïa kiwei pat kiba don sawdong bad ka”.
“Ka jingkhlad noh jong ka khlem dei por ka long kaba kham palat ban ïa ka jingduhnong shimet, ka dei ka jingduh kaba khraw ïa ka imlang sahlang jong ka kam ïalehkai jong ka jylla Meghalaya baroh kawei. Ki jingangnud, ka mynsiem bad ka jingieid jong ka ïa ka jingïalehkai kin ïai sah ha ki jingkynmaw.
Ka MFA ka don ryngkat bad ka ïing ka sem, ki paralok bad ki khynnah samla kiba ïalehkai lang bad ka Iba, ha kum kane ka por jong ka jingsngewsih kaba ym lah ban mutdur. To ai ba ka mynsiem jong ka kan shongthait ha ka jingsuk bymjukut.”
