Khlad kyndit u MP ka Shillong u Dr. Ricky AJ Syngkon, kyndit lut ki nongïalam VPP, CM, DyCM

Shillong, Rymphang 19 : U MP ka Shillong Parliamentary Seat u Dr. Ricky AJ Syngkon u la khlad noh kyndit kyndit ha ka janmiet sngi Palei hadien ba u la kem pang kynsan bad kyllon katba u dang ïalehkai phutbol ha Mawiong.
Katkum ka jingïathuh da u MDC ka VPP ba dei ruh u Chairman ka KHADC, Bah Strongpillar Kharjana la ong ba u MP ha kane ka janmiet u la leit ban ïalehkai phutbol sha Mawiong. Hynrei la ïathuh ba tang hadien katto katne por u la kem pang bad kyllon bad kumta mar mar kiba ïalehkai lang ki la pynkit noh sha ka jaka sumar kaba don ha Mawiong bad nangne pat la pynkit sha Robert Hospital ban ïoh ïa ka jingsumar kaba kyrkieh.
U Bah Strongpillar u la ïathuh ruh ba kane ka la jia ha ka por 7:00 baje ei ei janmiet bad na ka liang ki nongïalam ruh mar ïa tip ki la leit bran bran ban ban leit peit. Hynrei la ong pat ba dei hadien katto katne por ki doktor ki la pyntip ba u MP u la khlad noh na kane ka pyrthei.
Kane ka jingkhlad jong u Dr. Ricky ka la pynkyndit lut ïa baroh ki nongïalam ka party kumjuh naduh ïa u Myntri Rangbah ka Jylla Conrad K Sangma, Symbud Myntri Rangbah Bah Prestone Tynsong bad Bah Sniawbhalang Dhar, ki MLA bad ki MDC kiba la poi lang sha Robert Hospital ban wan sngewlem halor kane ka jingjia ba sngewsih.
Mar ïa tip halor kane ka jingjia, ki paidbah na kylleng ki la ïalum lang khrui bad pyndap ïa ka phyllaw jong ka hospital bad wat ki surok ruh ki la dap da ki paidbah baroh arliang.
Ha ka por ba sei ïa ka met napoh hospital ban rah sha ka ambulance ban leit buh pat sha iing, ka la mih ka jingïam briew kaba jur ym tang na ki longkmie hynrei wat na ki samla bad ki rangbah ruh.
Na ka liang u Myntri Rangbah kumjuh na ki Symbud Myntri Rangbah haba kren bad ki lad pathai khubor, ki la pynpaw ba u Dr. Ricky u dei uwei na ki nongmihkhmat uba jai jai tam bad uba ïoh ïa ka jingieid jong baroh.
“Kadei ka jingjia kaba sngewsih kthang shisha na ka bynta ki paidbah ka jylla khamtam ïa kito kiba ieid bad sngewtynnad ïa u Dr. Ricky. Nga dang ïa kynduh ïa u dang ha kine ki artaiew ei ei ha Delhi bad ngi la ïoh ban ïakren bun kiei kiei kiba dei na ka bynta ka lawei jong ka jylla khlem da ktah ïa ka politik. Kata kadei ka jingkynduh ba khatduh jongngi bad ka jingïakren bad u Dr. Ricky Syngkon,” ong u Myntri Rangbah.
Kum ka burom ïa une u nongïalam ba ki paidbah ki ieid, na ka liang u Myntri Rangbah u la pyntip ba ka Business Advisory Committee kan sa shong ïa ka jingïalang ba kyrkieh ha ka step sngi Thohdieng bad ba ki lah ruh ban rai ba kin sangeh shwa ïa ka Dorbar Mangtyngka ha kane ka sngi Thohdieng.