Khlad kyndit i Rev Dr. R.R Cunville ka jingduh kaba khraw ïa ki paid Khristan ka jylla ka Ri bad ka Pyrthei

Shillong, Kyllalyngkot 17: Ka long ka jingduh kaba khraw ïa ki paid Khristan ha ka jylla, ka ri bad ha ka pyrthei hi baroh kawei, namar hynne ka step jong ka Sngi Saitjain u Rev. Dr. Rieweh Robert Cunville ne Rev Dr R.R Cunville U Nongialam niam Khristan ba pawnam ha ka pyrthei ula khlad noh kyndit na kane ka pyrthei hapdeng ka jingshah sumar hapoh ka NEIGRIHMS, Shillong.
U Pastor Cunville ula khlad noh ha ka rta kaba 86 snem bad u dei u khun jong I (L) Dr R.L. Cunville bad (L) Kong Felicia Kharshiing bad la kha ïa u Dr Cunville ha ka 15 tarik u Lber 1939 ha Tezpur, Assam.
Ka nam bad ka burom jongu Pastor Cunville ka saphriang ym tang hapoh ka jylla, ka ri hynrei kylleng ka pyrthei khamtam ba u long kum uwei na ki Nongïalam bad Nongïalap ba pawnam ka Billy Graham Evangelistic Association (BGEA).
Ha kaba nyngkong eh u Pastor Cunville u dang mut ban leit pule noh ïa ka Law sha London hynrei hadien ba u la ïoh sngew ïa ka jingïïalap jong uwei u Nongialap shaphang u Jisu Khrist kumta ka la don ka jingkren ha u bad u la rai ban ym leit pule shuh ïa ka Law namar u la ïoh ka jingkhot ban shakri noh ïa u Trai Jisu.
Kumta u la leit ban pyndep ïa ka jingpule Pastor BD bad M.Th na Serampore College ha ki snem 1958-65 kaba don hajan Kolkata. Hadien kane u la leit pyntbit shuh shuh ban pule da kaba leit pule sha United State bad pyndep ïa a (MA) Master’s Thesis ha u snem 1974 bad Comprehensive Dissertation ha u 1975 ha Fuller Theological Seminary.
U la sdang ban shakri kum u Pastor naduh ki snem 1960 ha Kolkata. U la shakri lai snem kum u Pastor jongka Union Chapel kaba don ha Kolkata. U la ïathoh shong kurim bad I Kong Carol Rani ha u snem 1965. Ki la don arngut ki khun uwei u shynrang u bah Rapheal Cunville bad I Kong Rachel Cunville. Hadien kane u la sdang ïa ka kam ïalap bad pynïasoh bad ka Billy Graham Evangelistic Association (BGEA) ha u snem 1977. Ka jingïadei bad u Rev Billy Graham ka sdang na Nagaland namar u Pastor Cunville u la ïarap ban pynbit pynbiang ïa ka jingwan ïalap jong u Billy Graham ha Nagaland. Hadien ba u Pastor Graham u ïohi ïa ka jingtbit jong u Pastor Cunville naduh ka rukom kren haduh ka jingpynbit pynbiang ïa ka jingïalap kumta u Pastor Graham u la khot ïa u Pastor Cunville ban pynïasoh noh sha ka BGEA ha u snem 1977. U Pastor Cunville u la leit ïalap kylleng ki jaka ha ka pyrthei , ha ka ri, ha kane ka thaiñ shatei lam mihngi bad kumjuh ruh ha kane ka jylla.
Ha India la ithuh ïa u Pastor Cunville kum uwei na ki Nongïalap ba khraw jong U Blei. Ka jingleh rit bad jingshlur ban leit ïalap ïa ka kyrteng u Jisu Khrist ka la pynlong ïa ki paid Khristan bad ki bym dei Khristan ruh ban ieit bad burom ïa u Pastor Cunville. Sha man ba i leit ialap i khring da ki hajar bad phew hajar ngut ki nongwan sngap ïa ka jingïalap jongi shaphang u Jisu Khrist. Ha kawei na ki jingialap ha Surat ha u snem 2009 kiba wan sha ka jingïaseng kim duna ïa ka 25,000 ngut.
U Pastor Cunville u dei uba la pawnam bha ym tang hapoh jong ka ri India hynrei ha ka pyrthei hi baroh kawei bad udei uba la trei borbah ha ka ban leit ban ïalap bad pynsaphriang ïa ka ktien U Blei sha kylleng ki ri.
U Pastor Cunville udei na ka Balang Presbyterian Laitumkhrah.La Ordain ïa u da ka KJP Synod ha ka snem 1966 bad ula wanrah ïa ka kyrteng sha ka Balang Laitumkhrah ha ka snem 1998.
Ula long u Nonghikai ha ka Cherra Theological College, Sohra bad ula trei kum u Youth Secretary ka National Council of Churches . Hynrei U Blei ula khot ïa u ban ai ïa ka jingshakri da kaba ïalap ïa ka Gospel kylleng ka Pyrthei. Haba u Blei ula khot noh sha lade ïa u Rev Dr Billy Graham, u Rev Dr R.R. Cunville ula shah jied ban duwai ha ka sngi ba ontep ia u.
Ha ka snem 2010 ula shah jied kum u President ka United Bible Societies bad la jied biang ïa u ha ka snem 2016 sa na ka bynta 6 snem. Ha ka snem 2023 ula shah jied pat kum u President ka Emeritus United Bible Societies (UBS).
Ka jingkhlad noh jong u Rev Dr Cunville kam long ka jingduh kaba khraw tang ïa ka ïing ka seng, ki khun ki kti, ki khun ksiew hynrei khamtam eh ïa ka Balang Presbyterian bad ïa ki Balang Khristan kumjuh ruh ïa ki Khristan ha satlak ka pyrthei.