Khlad ka longkmie armet ha MCH Jowai, da ka ejahar ujor ki bahaïing ïa ka hospital

Jowai, Jylliew 05 : Kawei ka longkmie ba armet ba tip kyrteng kum ka Kong Pynchei Bareh, ka la khlad noh na kane ka pyrthei ha ka miet 4tarik mynta u bnai ha Maternal and Child Health (MCH) Hospital Panaliar, Jowai, hadien ka jingshitom phlei snam kaba jur ha kaba la mih ruh ka jingkynnoh ba ka daw ka dei namar ka jingslem ka jingïoh jingsumar.
Ka jingkhlad jong kane ka longkmie ba dang armet ka la pynbitar lut ym tang ïa ki bahaïing hasem hynrei wat ïa ki kynhun seng bapher bapher kiba don ha rilum Jaintia baroh kawei.
Halor kane, ka jingjia na ka liang ki bahaïing ha ka sngi Palei ki la ujor da ka ejahar ha Jowai Police Station pyrshah ïa ka jaka ai jingsumar.
La kynnoh ba ka jingleit jong ki ban ujor da ka ejahar ka dei namarba ka jingbymshimkhia jong ki nongtrei jong ka jaka sumar.
Katkum ka ejahar la ïathuh hadien ba la phah pynkit ïa ka Pynchei Bareh sha Maternal and Child Health Hospital, Panaliar, Jowai la ieh sah ïa ka khlem ka jingsumar kaba biang. La kynnoh ruh ba ki nongtrei jong ka hospital ki la pyntip ïa ka ba yn pynlong ïa ka jingsumar bad ki la ai jingmut ïa ka ba kan nym bam jingbam, hynrei la ieh sah khlem ai jingsumar watla ka don ha ka jingpang kaba jur bha.
La ïathuh ba ka kong Pynchei ka la hap ban bamja ha ka por 1:00 baje noh sngi ha ka 04.06.2025 namar ka jingbym shai halor ka jingsumar jong ka, kumta ha ka por kumba 5:00 baje janmiet, ka la mad ïa ka jingmih snam kaba jur bha bad ka la pyntip sha ki nongtrei jong ka hospital, hynrei ym shym la leh eiei. Hadien kata, ka la khlad noh na ka jingpang ha ka por kumba 9:30 baje mynmiet ha kane kajuh ka sngi.
Ki Pulit ki la leit shimti ïa ka metïap ha ka sngi Palei bad la pynkit sha Ïalong Civil Hospital ban leh ïa kaba donkam.
Ki bahaïing ki la kyrpad ïa ki bor Pulit ba kin shimkhia mardor ïa kane ka kam da kaba pynlong ïa ka jingtohkit pyrshah ïa ka Hospital bad la kyrpad ban pynïoh ïa ka hok jong ka longkmie ba la khlad noh.
Halor kane ka jingjia ba sngewsih, ki sengbhalang kiba don ha ka thain kynthup ïa ka KSU, JSU, JNC ki la pynrem jur bad dawa ruh ïa ka Sorkar ba ka dei ban shim kitkhlieh halor kane ka jingjia.
Ka Seng Kur Bareh East Jaiñtia Hills District ba la lamkhmat da u President Bah Finelyness Bareh, u General Secretary Bah Jesper Barehlem bad ki dkhot ka Committee jong ka Kur ki la pynrem jur halor kane ka jingjia bad ha ka sngi Palei ki nongïalam ka Seng Kur ki la leit sha MCH Jowai ban ïa kynduh ïa ki bahaïing bad ban aiti da ka jingthoh ha u Deputy Commissioner ka West Jaiñtia Hills District ban dawa na ka Sorkar Jylla ban pynlong ka jingtohkit halor kane ka jingkhlad ka kong Pynchei Bareh na ka shnong Jalaphet Bri Sutnga (Club Pyrdung) East Jaiñtia Hills District.
Ka Seng Kur ka ong ba kane ka la jia ka dei na ka daw jong ka jingbym shimkhia jong ki nongtrei jong ka Hospital kata naduh ki Doctor bad ki Nurse, kaba la pynduh ïa ka jingim jong ka longkmie ba armet.
Da kaba ïathuh shuh shuh la pynkit ïa katei ka longkmie ha katei ka Hospital hynnin ka sngi ha ka por 9 baje mynstep, hynrei na ka jingpynslem jong ki Doctor bad ki Nurse ban peitt bniah ïa ka jinglong jingman jong ka bad haka por 9 baje mynmiet eiei kala khlad noh.
Kumta ka seng kur kala pynpaw ka jingsngew bitar halor kane ka jingjia ba sngewsih bad kila dawa na ki bor ba halor ban pynshitom tyngeh ïa kiba donkti haka kam namar ka jingbym shimkhia jong ki ïa ka kam ba la bynshet haki.
Ha kajuh ka por ki la dawa ban pynïoh ïa ka hok na ka bynta ka longïing jong ka longkmie kaba la khlad noh bad kaba la ieh shadien ïa ki 7 ngut ki khun.
Ka Seng Kur hadien ka jingïakynduh bad u Deputy Commissioner ka WJHD ula kular ban pynlong ïa ka jingtohkit da ka kynhun halor kane ka jingjia.